Mizoram sorkarin forest clearance a dilna Document fel chu kan pe vek - Union Minister

Union minister of state for Environment, Forest and Climate Change (independent charge) Anil Madhav Dave chuan, hydel project-in ṭhatna leh ṭhat lohna a neih thu a sawi a, "Mizoramin hmasawnna hna thawhna tura forest clearance dilnaah document engkim felte chu clearance pek vek a ni," a ti.

Anil Madhav Dave hian nimin khan State Guest House-ah thuthar thehdarhtute a kâwm a; Vanglaini palai zawhna chhangin, "Hydel project hian environment a khawih loh chuan a pawina a awm lo. Amaherawhchu, power siam chhuahna atana duhthusam ber chu solar power a ni. Project reng rengin ṭhatna leh ṭhat lohna a nei vek a, hydel project pawhin ṭhatna leh ṭhat lohna a nei a ni," a ti a; environment khawih thilah thil ṭul hrang hrang zir chian vek ṭhin a nih thu a sawi.

Hmasawnna leh environment-te chu kal kawp tur an nih thu sawiin Union Minister chuan, "Forest clearance dilna lut reng reng document a felfai chuan pek nghal zung zung a ni. Document felfai lote chu zawhnate siamin, thil dik tâwk lo leh fel tâwk lo laite zawhfiah a ni ṭhin. Mi-zoramin hmasawnna hna thawhna atana forest clearance a dilte chu pek vek a ni a, pek loh a awm a nih chuan thil fel tawk lo a la awm tihna a ni ang," a ti.

Anil Madhav Dave chuan, tun dinhmunah Mizoramah sik leh sa dinhmun nuam mah se, ram dang aṭanga boruak ṭha lo lut avangin harsatna a tuar ve thei tho tih sawiin, "Ramrite'n min dang mah se, pindan pakhata khung khawm kan nih loh avangin, hmun danga boruak ṭha lo vangin harsatna in tâwk ve thei tho," a ti a; boruakah khawvel a inzawm vek avangin environment ṭha tak neih zel theihna atan ṭanho a ṭul thu a sawi.

Union Minister chuan, Envi-ronment, Forest and Climate Change a chan hnuah a ministry chan chu ṭha takin a zir chiang tih sawiin, "Uluk taka ka zir chian hnuah state hrang hranga ramngaw dinhmun zir chiang turin thutlukna ka siam a, Mizoram hi ka rawn zinna hmasa ber a ni," a ti.

Anil Madhav Dave hian nimin vêk khan PWD, Power & Electricity department, Biodiver-sity and Nature Conservation Network leh Association for Environmental Preservation hotute a kâwm a; Advance Research Centre for Bamboo and Rattan, Bethlehem Vengthlanga mi a tlawh a, Environment & Forest minister Lalrinmawia Ralte nen thing ṭiak an phun.

Union Minister hian nimin khan Imphal pan turin Mizoram a chhuahsan a ni.