Tripura-a Bru chhungkua 628 Kolasib dist.-a dah tur an awm

Kolasib District Level Co-ordination Committee on Bru chu nimin khan DC H Lalengmawia hoin a pisaah an ṭhukhawm. Tripura refugee camp
aṭanga Bru hruai kir tura beisei, Kolasib district chhunga dah tura tih zat chu chhungkua 628 an nih thu tarlan a ni.

Meeting-a tarlan danin, Bru lak let tura beisei, Kolasib district-a dah tura tih chhungkaw 628 zingah hian anmahni thua lêt an awm nual avangin enfiah hna kalpui a nih hnuah lak let tur chhungkaw zat a tlem rin a ni.

Meeting-ah hian, Bairabi lei zawh theiha siam zawh hman a nih loh vanga ruahmanna hmasa awm chu siam ṭhat vek a ni a, harsatna awm theite leh ruahmanna tharte an sawiho nghal.

Bru lak letna atan hian nodal officer leh assistant nodal officer ruat an nih bakah, Bru hruai lette awmna tur buaipuitu administrative officer atan Bairabi, North Thinglian, Dilzau, Zodin (Rastali), Meidum, Pángbâlkawn, Bûkvannei leh South Chhimluanga sikul zirtirtute ruat an ni.

Bru lak let hun atana pawimawh tur chên lailâwkna leh a huhoa an ei tur siamna tur choka siamna atana sum mamawh Rs. 1,10,02,560 leh veivahna tur lirthei mamawh zat tur Kolasib DTO-in a siamte chu Home department pawm tura thawn a nih thu meeting-ah hian tarlan a ni bawk.