Champhai dist-ah IWMP vanga tlangram Lo neih bânsan chhungkua 284 an awm

Champhai district MJA member-te chuan Thawhlehni khan Champhai IWMP-I Project hnuaia khaw pali - Kawlkulh, Dulte, Puilo leh Chhawrtui khuaa hmalakna hrang hrangte tlawhin an en. He project-a hmalakna vangin chhungkua 284-in tlangram lo neih an bànsan tawh tih an sawi.

MJA member-te hi Champhai DRDA project director CC Lalchuangkima leh a thawhpuite'n kaihruaiin, a hmunah Soil & Water Conservation officer Lalrinzama'n a lo dawngsawng.

Kawlkulh Chhimluanga conference hall sak te, balhla leh thingfanghma chìnna hmun te, Dulte khuaa bazar shed sak leh terrace laih te, Chhawrtuia vawk vulh-na hmun leh huan siamte leh, Puilo khaw chhunga hna thawhte an en a ni.

Champhai-I IWMP Project hi kum 2009-10 aṭanga thawh ṭan tur a ni a, kutthlak ṭan tak chu kum 2010-11 aṭangin a ni; sorkar kum kal mek 2016-17 tawh hunah a tawp ve tawh dawn. Project hnuaia hna thawhte chu MCS training neite'n ṭum 17 an tlawh tawh bakah, Mizoram páwn aṭangin ṭum li lai an rawn tlawh tawh a ni.

Project hnuaiah hian Rs. 4,55,90,976 sen tawh a ni a, khaw palia ram hectare 4,421-a zauah hmalak a ni. Land development atan Rs. 3,33,22,071, livelihood atan Rs. 57,69,570 leh production system & micro enter-prise-ah Rs. 64,99,335 sen a ni. Project hnuaia ṭanpuina dawngte'n April 2016 thlenga IWMP ṭanpuina hmanga sum an lak luh tawh chu Rs. 2,19,01,000 a tling tawh.

Dulteah chuan hmalak nan IWMP sum Rs. 65,06,953.50 hman a nih laiin, Rs. 42,35,000 an la lut tawh a; Kawlkulhah Rs. 1,45,71,323.50 sên a nih laiin, Rs. 56,80,000 an la lut tawh thung. Rs. 1,81,18,829 hmanna Chhawrtui khuaah Rs. 88,16,000 an la lut tawh a; Puilo khuaah senso zat Rs. 63,93,870 a nih laiin, mipuite sum lak luh chu Rs. 31,70,000 a tling tawh a ni.

IWMP Champhai-I Project hi Dulte khuain an hlawhtlinpui bera ngaih a ni a, an khuaa kut hnathawka eizawng chhungkaw 220 chuan kum tin ram vâta lo neih (shifting cultivation) an bànsan tawh. Kawlkulha chhungkaw 33, Chhawrtuia chhungkaw 18 leh Puilo khuaa chhungkaw 13-te'n tlangram lo neih an bànsan tawh bawk.