Larsap leh CADC hotute inkâwm

Governor Lt.Gen. Nirbhay Sharma chuan, nimin khan Chakma Autonomous District Council (CADC) hotute Raj Bhavan-a léngah sáwmin, an inkâwm a; CADC huam chhunga sorkar hmalakna leh mamawh hrang hrang an sawiho.

Larsap chuan, CADC sorkar hnuaia hmasawnna kalpui mek-ah, CADC leh state sorkar department-te thawhhona ṭha zawk an neih theih dan tur sawiho tura meeting ko a nih thu a sawi a, "Autonomous district council-te'n beisei angin hna an thawk chak lo a, a pawi hle," a ti.

CADC hotute chu an hnuai-a thawk tur an lak dawnin, danin a phût angin a (Governor) pawmpuina tel loa lak phal loh a nih thu hrilhin Governor chuan, hna lakna kalpui an neih reng reng chu titawp turin a hrilh a ni.

Lt.Gen. Nirbhay Sharma chuan, CADC area-ah a bik takin ziak leh chhiar thiam zat (literacy) a hniam lutuk tih sawiin, zirna, hriselna leh skill development lamah ṭan lak a ṭulzia a sawi a; CADC hotute chu an dinhmun dik tak zir chiang a, a hnenah report thehlut turin a chah.

Inkawmhonaah hian CADC chief executive member Kali Kumar Tongchangya, chairman Daya Chandra, executive secretary Purmendu Chakma leh official-te an tel a ni.