Union Minister-in Larsap leh CM a kâwm

Union minister of state for Environment, Forest & Climate Change (independent charge) Anil Madhav Dave chuan, Thawhlehni tlai khan Governor Lt.Gen. Nirbhay Sharma leh chief minister Lal Thanhawla te an chennaah a kâwm.

Larsap nen an inkawmnaah Anil Madhav Dave chuan, Prime Minister-in hmarchhak state-te tlawh turin ram roreltute a duh thu leh ram puma state 29 tlawh kual a tumnaah a bul ṭan nan Mizoram a tlawh thu a sawi a; "Mizoram leilung ṭhatna leh maua a hausakna hi hman ṭangkai dan zawn a, mau aṭanga thil siam deh chhuah hrang hrang chu sumdawnna lian takah siam tum a ni," tiin, hmarchhak state-te chu zin mite hîp zual nana chei a, chumi aṭanga state mipuite hlâwkna tur siam theih a nih thu a sawi.

Governor chuan, sorkar laipui-in hmarchhak bial a ngaihsak zual avangin hmasawnna nasa tak a thleng mek tih sawiin, "A hmun ngei tlawha hmarchhak bial mipui-te dinhmun leh mamawh hriat hi ram hruaitute tih tur dik tak a ni. Mizoram chu thlai leh thei eng pawh ṭhat duhna, ramngaw zau tak leh mau tamna hmun a nih bakah, ramhmul damdawi lamah a hausa hle a, sorkar laipui pawhin heng kawngah hian hmalakna lian zawk a neih a pawimawh," a ti.

Chief Minister nen an inkawmnaah Union Minister chuan, "Khawpuia mihring cheng an pun belh zel a, chuvangin bawlhhlawh sawngbawlna leh tuichhe paihna tur ruahmanna ṭha tak neih a pawimawh dawn a, ruahmanna
ṭha a awm loh chuan nakin zelah khawpui ṭhang zel hian chona lian tak min siamsak dawn a ni. Hemi kawngah hian ruahmanna ṭha leh tlo kan neih a ṭul," a ti.

CM Lal Thanhawla chuan Union Minister hi NLUP chungchang hrilhin, "Khawvelin a buaipui mek sik leh sa inthlak danglam, global warming leh kan chhehvelah boruak chhe zel tur venna piah lamah, tuihna humhalhte chu NLUP tum a ni," a ti a; NLUP chu UNO lam pawhin ṭha a ti a, UNO agency palite'n hmalakna an neih mek thu a sawi a ni.