Lunglei-ah mipuiin court an bei Magistrate quarters suasam a ni

Nimin khan August 27, 2016 zana Lunglei Zohnuai mi, C Lalsawmliana (33) vit hlumtua puh Stephen Lalchawiliana hmel hmuh tumin Zohnuai veng mipuite Lunglei Court tualah an pungkhawm a; anmahni dangtu police-te nen an innawr buai a, Court building an vawm bakah, Lunglei Chief Judicial Magistrate quarters an suasam.

Police hotute hnen aṭanga thu dawn danin, Lunglei Zohnuai mipuite hian Stephen Lalchawiliana chu nimin khan Court-ah a inlan dawn nia hriain, a hmel hmuh tumin chawhma dar 10:30 velah Court tualah an pungkhawm ṭan a; police-te nen an innawr buai a, hliam tênau tuarte pawh an awm. Mipui hian Court chu lung leh leirawhchante hmangin an vawm a, tukverh darthlalangte an vawm chhe nual a ni.

Mipuite chuan chawhnu dar 1:00 velah magistrate Malsawmdawngzuala chenna quarters an pan a, ina awm mekte chu an tlanchhia. Mipuite chuan quarters chu luhchhuahin, in chhung bungruate leh thawmhnawte an suasam a, an hâl bawk avangin, thawmhnaw hâk thlâk tur pawh an nei lo niin an sawi.

Stephen Lalchawiliana hi niminah Court-a inlan tur anga hriat a nih laiin, September 21 khan District Jail-ah camp court neih chilhin, a chungthu ngaihtuah a ni. A hmain Chief Judicial Magistrate-in Zohnuai khawtlang hruaitute hnenah Stephen Lalchawiliana hmél hmuhtir a lo intiam tawh lai a, camp court a nih leh si avangin Zohnuai mipui an lungawi lo zual nia thu dawn a ni.

Zohnuai mipui pungkhawmte hi mi 200 vel an nia hriat a ni a, buaina chhuak thei véng turin Lunglei police (MRP) leh MAP platoon khat duty tir an ni a, a hnuah platoon khat dang an chah leh a ni.

Mipui náwlpui an ṭîn hnuah, mi eng emaw zat chu nimin tlai lam thleng khan an la pung khawm a; Lunglei District Magistrate (DC)-in tlai dar 4-ah Cr.PC Section 129 hmangin mi panga aia tam punkhawm khapna leh muanna tichhe theia awm khapna thupek a chhuah. District Magistrate-in thupek a chhuah hnuah police-te'n mi 17 an man nghal a, nizan khan police-te'n an kawl nia thu dawn a ni.

Zohnuai Branch YMA president R Lallunghnema chuan Vanglaini palai zawhna chhangin, buaina chhuakah hian Zohnuai khawtlang hruaitute leh YMA Sub-Headquarters, Lunglei hruaitute'n nasa takin bán an phar tih a sawi a, "He thil thleng hi a pawi kan ti a, kan duh hauh loh thil a ni. Police lam an lo tam tâwk lo bawk nen, inkhap beh a har a ni," a ti.

Zohnuai YMA President sawi danin, nimina innawr buainaah hian an veng mi zingah mi pahnih/pathum an hliam a, hliam zingah YMA President pawh a tel a, a lú a pawp a ni.

Buaina chhuah hnu hian Gauhati High Court Registrar General H.K.Sharma nimin khan order a chhuah nghal a, Lungleia District & Session Judge R. Thanga, Addl. District & Session Judge Helen Dawngliani leh Civil Judge cum JMFC R. Malsawmdawngzuala te chu thu leh awm hma atan sawn chhuah an ni. Lawngtlaia CJM Laldinpuia Tlau pawh Lungleiah Circuit Court-a kal rih lo turin a hriattir bawk.

Tarlan tawh angin, August 27, 2016 zan khan Zohnuaiah Stephen Lalchawiliana leh Muana-te an intithiam lo a, chu chu Lalsawmliana'n a ṭhelh. Lalsawmliana kal sawn tur chu Stephen Lalchawiliana'n chemtein a dulah a vit a, damdawi-in panpui a nih laiin a thi. Tualthattua puh hi IPC 302 hmangin thubuai siamsak a ni.