Naupang sawisatu leh hlamchhiahtute lakah CWC leh JJB-te'n FIR an thehlut

Aizawla Child Welfare Committee (CWC) leh Juvenile Justice Board (JJB)-te chuan, tun hnai khan mahni fate tlanbosan­tu, tiduh­dahtu leh hmelhriat loh hnena petu mi pathum lakah FIR an thehlut.

Aizawl district Child Protection Unit (CPU) thuchhuah tarlan danin, Champhai district-a khaw pakhat pa pakhat chuan a fa thla 8 mi chu Zonuam, Aizawla mi hnena hnutchhiahin a tlanbosan a, a hnutchhiahnate hian social media-ah naute hming tarlangin, a hnut­chhiahtu chuan thla khat chhunga naute lam a lam loh chuan engmah an sawi buai thei tawh loh tur thu a puangzar a ni.

Naupang harsatna tâwk hming chu engti kawng pawha puanzar phal a ni lo tih sawiin, Aizawl CPU chuan, Juvenile Justice (Care &Protection of Children) Act 2015 hnuaiah thla ruk tàn emaw, Rs. 2,00,000 thleng chawitir theih a nih thu an tarlang a; naupang hlamchhiahtu pawh kum 3 tàn leh Rs. 1,00,000 thleng chawitir theih a nih thu an sawi bawk.

Aizawl veng hmawr deuha nu pakhat, a pasalin a tlanbosan chuan a fapa kum 1 leh thla 2 mi chu Rang­vamuala a zu inna hmuna lo awm ve mi pakhat hnenah a pe a; hetianga tih hi IPC Section 317 bawhchhiatna a nih avangin kum 7 thleng tàn theihna a ni.

Aizawl hmar lama pa pakhat chuan a nupui leh a fate chu hun rei tak chhung a sawisa
ṭhin a, ṭhenawm khaw-vengte ngaimawh khawpin a nupui fanaute a nghaisa ṭhin a ni. Hetianga insawisak hi JJ (Care &Protection of Children) Act 2015 Section 75 hmangin kum 3 tàntir leh Rs. 1,00,000 thleng chawitir theih a ni.

Mahni invenghim thei lo, naupangte aiawhin an dikna chanvo an humhalh­sak zel dawn tih sawiin, CWC leh JJB-te chuan, "Naupang tihduh­dahtu, ngaihthah leh thlahthlam­tute chungah na taka hmalak a nih theih nan Bawngkawn Police Station leh Sialsuk Police Station-ah FIR thehluh a ni," an ti.

CWC leh JJB-te chuan, tun chinah nau­pang ngaihthah leh thlahthlam hria chuan mahni thua hma la lo a, CWC hnenah (0389- 2341014 / 0389-2395557) emaw, Childline number 9774222275 / 1098-ah emawh hriattir zel turin an ngen a; naupang thil tisual tite chu JJB hnenah thlen zel turin an ngen bawk.