KHAWTHLIR

Thisen pe

Sialsuk Pastor Bial KṬP chuan nimin khan Sialsukah blood donation camp an huaihawt a, mipa 49 leh hmei­chhia pathumte'n Synod Hospital tan thisen unit 52 an pe.

In saksak

Saitual Venglai Branch YMA bultumin nimin khan an huam chhunga chhungkua harsatna tawk mi pakhat in an saksak. In saknaah hian veng chung mi ṭhahnemngai bakah, MHIP, MUP, Mistiri Association leh V/C-II an hnatlang a; in chu a dung ft. 18 leh a vâng ft. 12-a zaua sak a ni.

HSLC result

Mizoram Board of School Education chuan vawiin tlai dar 3 hian HSLC Special Examination result a tichhuak dawn a, Chal­tlanga MBSE pisa kawtah leh website www.mbse.edu.in ah result en theih a ni ang.

Rate siam thar

Aizawl DC Kannan Gopinathan chuan hriattirna chhuahin, silai licence a fresh (thar), renew fee leh thil dangah rate thar hman tur siam a nih thu tarlangin, "He thu chhuak ang hian October 1, 2016 aṭang chuan fee thar anga lak tawh tur a ni ang," a ti. Rate thar ang chuan licence thar fee chu Rs. 1000 leh renewal fee chu Rs. 500 a ni.

Reduction workshop

Baptist Church of Mizoram hnuaia Relief & Development department leh Bread Network, USA-te ṭang dun chuan September 21-22 chhung khan Savidge Hall-ah Aizawla ṬKP unit member-te tan disaster risk reduction workshop an buatsaih. Workshop-ah hian Disaster Management & rehabilitation, Geo Hazard International, BCM Relief & Development department leh Asian Pacific Baptist Aid hotuten thu an sawi.

Heroin man

Excise & Narcotics department-a Anti-Narcotics Squad-te chuan, nimin chawhnu dar 1:30 khan Tuikual North-ah heroin gram 47 leh a neitua puh mi pahnih - Lalṭhai (40), Tahan leh Lalrinchhani (31) d/o Lalthanga, Saron Veng, Aizawl nia in­chhálte an man.

Purûn chìn zir

Nimin khan Champhai DAO meeting hall-ah Champhai district-a Agriculture field officer leh technical staff-te tan purûn chìn dan zirna buatsaih a ni. Training-a telte hian anmahni enkawl cluster ṭheuhah lo neitute training an pe chhawng leh ang.

MLA-in lawmpui

Mizoram University (MZU)-in kumina master degree result a tihchhuaha Master of Information Library Science-a gold medalist Esther Lalruatpuii d/o CD Lalṭanpuia, Lunglei Bazar Veng chu nimin khan bialtu MLA, Chalrosanga Ralte-in an chenna inah chawimawina thuziak leh lawmpuina Rs. 5,000 a hlan.

Faina Hapta

Kolasib DC H Lal-engmawia hoin nimin khan DC conference hall-ah Faina Hapta hman dan tur ngaihtuah a ni a, hapta pual hian fai lawmman - sikul, veng, pisa, hotel/restaurant leh home-te tan buatsaih ni se, an ti.