16th FC-in ZMCH leh Falkawn an tlawh

16th Finance Commission hotute chuan nimin khan Zoram Medical College & Hospital (ZMCH) leh Falkawn an tlawh a; ZMCH hotute leh Falkawn khawtlang hruaitute kâwmin, an dinhmun leh mamawhte an sawipui.

16th FC hotute hi Health & Family Welfare minister Lalrinpuii leh secretary Sangchhin Chinzah bakah, ZMCH hotute'n an lo dawngsawng a; ZMCH Academic Block Council Room-ah an inkâwm a ni.

Minister Lalrinpuii chuan, 16th FC-ah beiseina sang tak an neih thu sawiin, "ZMCH bakah HFW deparment kaihhnawih thil pawimawh tak tak in hnena kan thlente hi Mizoram hmasawnna atana pawimawh ber berte a nih avangin min ngaih pawimawhsak tur leh a tihhlawhtlin dan kawng min ngaihtuahsak turin ka ngen che u a ni," a ti.

Inkawmnaah hian ZMCH director Dr John Zohmingthanga’n ZMCH din ṭan dan leh thlen chin te, hmasawnna tur leh mamawhte a tarlang.

16th FC hotute hian ZMCH out-patient department (OPD), labora-tory leh deparment hrang hrang an tlawh a; ZMCH hotute'n an dinhmun leh hmasawn theihna tur la awm ang angte a hmunah an hrilhfiah a ni.

Finance Commission hotute hian Falkawn Bharat Nirman Rajeev Gandhi Sewa Kendra (BNRGSK) hall-ah Falkawn Village Council hruaitute an kâwm a; LAD director Chauhnuna pawh a tel.

Falkawn VC hruaitute chuan, VC inrelbawlna kalphungte sawifiahin, an tawnhriat aṭanga Mizoram pum huap VC-te mamawh leh hmasawnna tur bakah, hmalak dan thar tur atana ṭha nia an hriatte an thlen a ni.