Luangmual - Vaisam inkar kawng siam mek chungchang sawiho a ni

Lunglei South bialtu MLA Lalramliana Papuia leh Lunglei West bialtu MLA T Lalhlimpuia te kaihhruainain February 24, Thawhṭanni khan Pradhan Mantri Gram Sadak Yojana (PMGSY) hnuaia Lunglei Luangmual leh Vaisam inkar kawng siam mek chungchang sawiho a ni a; vawiinah kawng siam mek an enho dawn.

YMA, Vaisam Branch chuan tun hnai khan thuchhuah siamin, Luangmual leh Vaisam inkar kawng PMGSY hnuaia siam chu a chhe hle tih an tarlang a; kawng chu a nih dan tur ang taka siam turin contractor VRS Construction, Zonuam, Aizawl an phût bakah, a ṭul anga hma la turin sorkar an ngen a ni.

Nimina ṭhutkhawmah hian Luangmual-Vaisam kawng siam mek dinhmun leh thlen chin bakah, ṭha tak leh a hun taka kawng siam zawh a nih theih nan ruahmannate sawiho a ni. February 26, 2025 (vawiin) hian YMA Sub-Headquarters, Lunglei hruaitute huaihawtin PWD hotu te, contractor, Vaisam leh Chithar khawtlang hruaitute a hmunah kawng siam mek enfiahin, thil nih dan leh hmalak zui dan turte sawiho ni se, an ti.

MLA Lalramliana Papuia chuan, bialtu MLA a nih angin kawng siam mek chu a vei thu leh a thlithlai reng thu sawiin, "Duhthusam lo lai a awm pawhin ràl aṭanga intàwng mai loin, bialtu MLA hnenah thlen ni se, ṭha taka sawihoa hmalak zui ka inhuam reng a ni," a ti. PWD leh contractor-te chu uluk leh fimkhur taka hma la tur leh khawtlang hotute leh mipuite nen inpawh tlang taka thil sawiho a, hna a ṭhat theih nan thawkho zel turin a chah.

MLA T Lalhlimpuia pawhin department leh contractor-te chu mipui ṭhahnemngaihna rilru hrethiam a, lungloha la mai lo tur te, ṭha taka hna thawh zawh a nih theih nan theihtawp chhuah zel turtein a chah bawk.

Luangmual-Vaisam kawng PMGSY hnuaia siam mek hi km. 28-a thui a ni a, composite work, kawng laih aṭanga cement hmanga luan (flexible pavement) thleng thawh tur niin, kawng siamna tur sum (agreement amount) chu cheng nuai 4,518.74 a ni.

March 2025-a thawh zawh tura ruahman niin, February 2, 2025 thleng khan 97.13% zawh a ni tawh. Contractor-in kawng a enkawl zui hun chhung tur (defect liability period) chu kum 5 a ni a, chumi chhung chuan contractor-in kawng a chhiat thulhah mawh a phur a, a thawm ṭhat zel a ngai dawn a ni.