Mizoram sorkar leh SIDBI-te'n Memorandum of agreement an ziak

Mizoram sorkar leh Small Industries Development Bank of India (SIDBI) chuan Credit Guarantee Fund Trust for Micro and Small Enterprises (CGTMSE) chungchangah nimin khan thawhhona thu-thlung, memorandum of agreement an ziak.

Thuthlung hi Mizoram State Policy Coordination Committee vice chairman Dr KC Lalmalsawmzauva hmaah Commerce & Industries secretary Dr Lalzirmawia Chhangte leh CGTMSE chief executive officer Manish Sinha ten an ziak a ni.

Dr KC Lalmalsawm-zauva chuan, "MoA ziahnaah hian progress partner-te bána kaihna tur hian Mizoram sorkar chuan loan rùl ṭhate chu loan pung an rulhna a rùl lêt zel dawn a ni," a ti.

Sorkar thuchhuah tarlan danin, CGTMSE hi sorkar laipuia Ministry of Micro, Small & Medium Enterprises leh SIDBI-te'n micro, small & medium enterprise (MSME)-te tan manufacturing leh service pek kaihhnawih eizawnna hrang hrang, lian tham si lote’n an hmalakna atana sum mamawh phuhrûk tura awlsam zawka loan an lak theih nana ruahman a ni.

MSME loan late chu CGTMSE hnuaiah an loan lak aṭanga 75-85% thleng guarantee peksak a ni ṭhin a; chuta tan chuan loan latuin fee a chawi a ngai a, bank lam tan risk a la sàn deuh avangin loan dilna tam tak hnâwl a lo ni tawh ṭhin.

Mizoram sorkar leh SIDBI thawhhona hnuaiah hian Bána Kaih (Handholding) scheme aṭangin 95% thleng guarantee tihsàn a nih dawn bakah, Mizoram sorkar chuan guarantee fee a tumsak vek dawn a; hei vang hian dahkham leh guarantor ngai loin awlsam zawkin loan lak theih a ni ang.

Thuthlung ziahnaah hian Bana Kaih scheme thawhpui bank - SBI, MRB, MCAB leh Finance department aiawhte bakah, Handholding Scheme hnuaia nodal officer-te an tel a ni.