Champhaiin CM hnenah State University an dil

Champhai District NGO Coordination Committee chuan chief minister Lal-duhoma hnenah lehkhathawnin, Cham-phaia State University din turin an ngen.

Champhai NGO chuan Mizoram sorkarin State University nei turin chak takin hma a la mek tih tarlangin, "Central University (MZU) kan nei tawh a, state capital-ah a awm. MZU bakah hian state leh national level educational institution ṭhahnem tak Aizawlah a awm. Tin, MZU Southern Campus pawh Lunglei a dah tura phalsak tawh a ni. Hei bakah hian Mizoram Engineering College, Lungleia dah tura ruahman niin, 2026 ah class ṭan tura buatsaih mek niin kan lo hria. Mizoram Polytechnic leh ITI-te pawh Lungleiah hian a awm mek a ni," a ti.

Khawchhak lamah hian institution leh training centre lian tham engmah dah a la awm lo tih tarlangin Champhai NGO chuan, "Chuvangin State University hi chu Mizoram khawpui lian pathumna Champhaiah dah ngei turin i khawngaihna kan rawn ngen e. Mizoram State University dahna tur hmun ruak ṭha leh rem tak tak Champhai bawrah a la awm nual. Luah nghal mai theih turin Champhai Tlangsamah Polytechnic building peih sa diam pawh a awm," an ti a, Champhaiah sumdawnna ringawt ni loa, mipui sukthlek tih danglam a ṭul thu an tarlang.