KHAWTHLIR

KṬP-in thisen pe

KṬP, Khatla North Branch chuan KṬP Day pualin nimin khan an kohhran hall-ah thisen pek an huaihawt a, Synod Hospital tan thisen unit 28 an pe a, petute mipa 22 leh hmeichhia paruk an ni.

Outreach programme

Central Bureau of Communication (CBC) Aizawl Field Office chuan nimin khan Muthi YMA Hall-ah Viksit Bharat Special Outreach programme an buatsaih. He hunah hian Muthi khawtlang mipui an tel a; Aizawla CBC in-charge Lalginlen Lhouvum-in outreach programme an buatsaih chhante a sawi a, resource person Kaphmingthanga'n Viksit Bharat chungchang sawiin, sorkar laipuia scheme hrang hrang a sawifiah.

Aizawl Day 2025 lawm chhunzawm

Aizawl Municipal Corporation huaihawtin nimin khan Lammualah Aizawl Day lawm chhunzawm a ni. Nimina Aizawl Day lawmnaah hian stall hrang hrangah Mizo kutchhuak thil chi hrang hrang pho chhuah a ni a, tlai lam aṭangin concert buatsaih a ni. Aizawl Day lawmna hi vawiinah chhunzawm a ni dawn a, tlai dar 3-ah khàrna hun hman a ni ang.

Naupang zirtir

Assam Rifles chuan February 25, Thawhlehni khan Tipa Primary School, Siaha districtah naupang chunga hleilenna chungchang inzirtirna hun an hmang. Zirlai naupang 40 vel an tel a, naupang chunga hleilenna thleng thei leh chumi laka inven dan te, an himna atana an tih turte an zirtir a ni.

Meth kg 23.43 man

Mizoram Police-te chuan February 25, Thawhlehni zan khan Vairengte police check gate-a lirthei an enfiahnaah Brezza car MZ-01 AC-9669, Zokhawthar aṭanga Assam lam pan aṭangin methamphetamine kg. 23.43 an man a; car khalhtu Vanlalfela (23) s/o Lalhmunmawii, Zokhawthar leh a thurualpui Zingengmawia (27) s/o Laldinpuia, Falkland Veng, Aizawl nia insawite an man nghal. Meth an man hi cheng nuai 299 hûa chhût a ni.