Minister-in tui khuah lailâwkna a en

Public Health Engineering (PHE) minister Prof. Lalnilawma chuan nimin zing khan Tlawng lui tui kám zel tur venna atana Reiek kaia lung hmanga tui khuah (temporary barrage) siam mek a en. PHE hotute chuan kumin ṭhál hi Tlawng lui tui a la tlem ber ṭum ni turah an ngai.

Sorkar thuchhuah tarlan danin, Aizawl khawpui châwmtu Tlawng lui tui a kum tèla a kàm zel avangin kum 2022 aṭang khan ṭhál inṭan tak tak hmain tui tihtlinna atan kum tin temporary barrage siam ṭhin a ni a; chu chuan ṭhál khaw ro tak tak laiin chawlhkar khat vel tla tur tui a khâwl thei ṭhin. Kumina temporary barrage siam mek chu metre 2.5 vela sang, metre 350 vela thui tui tling thei tura beisei a ni.

April 9, 2021 khan Greater Aizawl Water Supply Scheme Phase-I leh Phase-II aṭanga Aizawl khawpui châwm tura tui MLD (million litre per day) 38 mamawh a nih laiin, Tlawng lui tui chu MLD 31.461-ah a tla thla a; chumi aṭang chuan tui a kàm zel loh nan kawng hrang hrangin hmalak a ni.

Prof. Lalnilawma chuan, PHE department hotute chu hmalakna leh ruahmanna dang awmte a sawipui a; tui supply-a hmasawnna tur ruahmanna hrang hrangte ngun taka ngaihtuah chungin chak taka hmalak zel a nih tur thu a sawi.

PHE Minister hi Aizawl West-III bialtu MLA VL Zaithanzama leh PHE department hotute'n an ṭawiawm a ni.