Luangmual - Vaisam kawng siam chungchangah Lokayukta-ah zualko

Lunglei Luangmual leh Vaisam inkar kawng siam mekah kawng siam dan tur anga siam a ni lo nia hriat vangin Vanramchhuangi, Chaltlang chu February 25, Thawhlehni khan Mizoram Lokayukta-ah a zualko.

Vanramchhuangi hian, "Ram dan ding lai leh ram mipui zahlohna nasa taka a mawhphurtu contractor VRS Construction, Zonuam, Aizawl leh Lunglei Road Division-II, Lunglei, Mizorama a hotu lu berte an thil tihsual anga hrem an nih ngei theih nan dan anga hma la turin ka ngen a che," tiin Lokayukta a ngen.

Complaint thehluttu hian March 15, 2024-ah Luangmual-Vaisam (Lunglei district) PMGSY kawng laih meka kawng sir tui luankawr (side drain) hna chhe lutuk, kuta khawih leh kea rah hleka sawm nghal vek thei leh, he kawngah vek hian February 20, 2025 khan blacktopping chhe lutuk, kut lâwnga khawh theih video clip viral a hmuh thu a tarlang.

Vanramchhuangi hian complaint a thehluhah hian, PMGSY sum hmanga laih, Luangmual-Vaisam kawng chhia thlalak/video clip leh kawng laiha information pawimawh, RTI Act hmanga an dil chhuahte a thil tel a ni.