Kolasib MJA-in kawng siam mek an en

MJA, Kolasib District member-te chuan nimin khan NHIDCL hnuaia National Highway (NH) 306 kawngpui siam mek an enfiah a; kawn siamna atana lung an hmante chu a ṭha tâwka an hriat thu an tarlang.

Kolasib MJA tarlan danin, NH-306 siam mek hi Ministry of Road Transports & Highways hnuaia awm a ni a, Mizoram PWD leh NHIDCL-in enkawl chin an nei ve ve. NHIDCL-in Bilkhawthlir aṭanga Vairengte inkar enkawlin, kawngpui thawm ṭha turin Balaji Construction an chhawr a; Balaji hian February 1, 2025 khan Vairengte aṭanga blacktopping hna ṭanin, North Chhimluang an pêl chho tawh.

Balaji Construction kawng siam tur chin hi km. 28 a ni a, km. 18 an siam zo tawh. Balaji Construction project director Rajesh Chaudhary chuan, an hnathawh hmabak awmte chu March 2025 chhungin zawh vek an tum tih Kolasib MJA-te a hrilh.

Kolasib Leitan leh Bilkhawthlir futsal ground inkar kawngpui chu MoRTH hnuaiah Mizoram PWD-in an enkawl a; tun dinhmunah thawm ṭhat mumal a ni lo a, a siamna tur sum pawh a awm lo.

PWD enkawl lai kawng a chhiat nasat avangin PWD (Highway Division) chuan kawng neitu Ministry of Road Transports & Highways hnuaia Regional Office, Guwahati-ah short term maintenance fund cheng vbc 4.74 an dil mek. Regional Office lam aṭangin chhanna an la dawng lo a, fund a awm loh avangin kawng chhe lai an thawm ṭha thei rih lo tih PWD hotute chuan an sawi.

Nimina Kolasib MJA-te'n an tlawh lai hian hmun eng emaw zatah lirthei tlân harsa khawpin kawng chhia a la awm a; Kolasib Gosen Veng leh Bilkhawthlir khaw chhung te, Keichamahte kawng khuar a la nasa zual a ni.

Kolasib District MJA president Andrew Vanlalauva chuan, kawngpui pakhat, enkawltu hrang awm chuan harsatna a thlen nia a hriat thu a sawi a, "Kolasib leh Bilkhawthlir inkar kawng pawh a rang thei ang berin NHIDCL lamin la se, tun ang renga ngaihsak loh a nih chuan fûrah mipuite'n harsatna lian zawk kan tawh a rinawm. Chumi a thlen loh nan chuan short term maintenance fund hi PWD (NH Division)-te'n an hmuh thuai theih nan state sorkar pawhin na zawkin MoRTH dawr se a ṭha hle," a ti.