Pangzawl YMA-in an member thattu a phû tâwka hrem ngei an phût

YMA, Pangzawl Branch chuan thuchhuah siamin, an member Valentine VL Chhana Hrahsel (23) s/o H Malsawmtluanga, Kerala-a mechanical engineer thattu, a Mizo zirlaipui Lawmsangzuala, Kawlkulh chu a phú tâwk ang ngeia hrem an phût thu an puang.

Valentine VL Chhana Hrahsel chu khawngaihna tel miah loin a zirlaipuiin a that tih tarlangin Pangzawl YMA chuan, "He thu hian Pangzawl khua leh Mizo thinlung a tina tak zet. Valentine-a hi mi zaidam tak leh rilru ṭha tak a ni tih hi khawtlang mipuiin amah kan hriat dan a ni," an ti.

Pangzawl Branch YMA chuan, tualthahna thleng chu pawi an ti a, rapthlak an ti tak zet tih tarlangin, "Hetiang thil hi tu chungah mah thleng nawn leh tawh lo se kan duh," an ti a; pawikhawihtu chu a phû tâwk ang ngeiin, dan anga na taka thuneitute'n an hrem ngei an phût tlat tih an tarlang a ni.