KHAWTHLIR

Thisen pe

Isua Krista Kohhran Ṭhalai Pawl, New Siaha Bial chuan nimin khan Siaha District Hospital tan thisen unit 19 an pe a, petute mipa 14 leh hmeichhia 5 an ni.

Thisen pek inzirtir

MSACS leh Association for Voluntary Blood Donation (AVBD) chuan nimin khan Siaha District Hospital Medical Superintendent hall-ah 'Training on Blood Donor Motivators' an buatsaih a, February 26, Nilaini khan Lawngtlai CMO hall-ah an buatsaih bawk. Training-ah hian kohhran ṭhalai pawl leh NGO hrang hrang hruaitute an tel a; thisen pek chungchanga hriat tur pawimawh chi hrang hrang inhrilhfiah a ni.

Lehkhabu lehlin ṭha

Mizo Writers Association chuan kum 2024 chhunga lehkhabu Mizo ṭawnga lehlin ṭha a thlannaah a ṭha zual panga a tlang chhuak tawh. Lehkhabu lehlin ṭha zual pangate chu - 'Hringnun thawnthu ril' (C Ramdinmawia), 'Pa hausa pa rethei' (Lalrinzuala Pachuau), 'Bungbel thianghlim' (Zothanmawia Khiangte), 'The 5 points of calvinism' (F Lalremsiama) leh, 'Pathian hmangaih la, i duh danin awm ang che' (Zohmingthanga Renthlei)-te a ni.

MBKHP rorel

Mizoram Baptist Kohhran Hmeichhe Pawl (MBKHP) rorel vawi 75-na chu nimin khan BCM Central Church, Aizawl biak-inah neih a ni a, BCM general secretary Rev. Dr R Lalbiakliana’n a hmanpui. Rorel hi MBKHP president HK Lallianzauvi'n a kaihruai a, rêl tura lutte rêl a nih bakah, member thi 304-te sûnna hun hman a ni. MBKHP-ah hian pastor bial 92-ah unit 475 leh member 34,857 an awm mek.

PUC-ah seminar

Mizoram University leh Pachhunga University College-a Department of Political Science leh ZONET TV chuan nimin khan PUC-ah 'Rethinking identity: Interdisciplinary perspectives on borders, statelessness and security' tih thupui zirhona an buatsaih a, PUC principal Prof. H Lalthanzara'n a hmanpui. Seminar-ah hian mithiamte'n thuziak eng emaw zat zirho a ni.