Dept/office 17 hnenah lirthei 27 hlan

Transport minister Vanlalhlana chuan nimin khan Chaltlang Transport Complex-ah Transport department-in Ministry of Road Transport and Highways (MoRTH) aṭanga Voluntary Vehicle Modernization Policy (V-VMP) incentive a dawn hmanga SASCI Part-II kaltlanga lei lirthei 27 chu sorkar department/office 17 hnenah a hlan.

Voluntary Vehicle Modernization Policy (V-VMP)/Vehicle Scrapping Policy (VSP) hi MoRTH-in lirthei hlui tawhte environment venhim leh chetsualna thleng ṭhinte tihtlemna atan hluihlâwn a, a thara thlak tura lirthei neitute tana ruahmanna a siam a ni.

MoRTH hian milestone hrang hrang a siam a, milestone pakhat tihhlawhtlin a nihin incentive cheng nuai 300 pe ṭhin a; Mizoram Transport department chuan lirthei hlui tawh 93 a hluihlâwn hmangin incentive a dawng.

Vanlalhlana chuan, lirthei 27 leite chu SASCI sum cheng vbc 2.8 hmanga lei a nih thu a sawi a, "Transport department chuan incentive hi mahni department bil atan hmang mai loin, GAD nen ṭang dunin tun hi kan lo thleng a ni," a ti.

Transport Minister chuan, lirthei hlui tawhte mumal zawka hluihlâwn a nih theih nan MoRTH-in Vehicle Scrapping Policy a duan thu sawiin, "Mizoram Transport department pawhin Hlimena kan ramah Registered Vehicle Scrapping Facility (RVSF) din turin hma a la mek," a ti a; lirthei kum 15 aia upa hman tlak tawh loa ngaihte chu scrapping facility-ah recycle a nih dawn thu a sawi.

LIRTHEI DAWNGTUTE

1. Cooperation - 1

2. LAD - 1

3. LESDE - 1

4. Fisheries - 1

5. Excise & Narcotics - 4

6. Taxation - 1

7. SAW - 3

8. Power & Electricity - 1

9. Art & Culture - 1

10. Chief Controller of Account - 1

11. Land Revenue - 2

12. Police (DGP) - 4

13. Planning - 1

14. GAD - 1

15. Health Services - 2

16. Hospital & Medical - 1

17. EFCC (PCCF) - 1