NITI Aayog member-in ZMCH a tlawh

NITI Aayog member Dr Vinod K Paul leh a thawhpuite chuan February 26, Nilaini khan Zoram Medical College & Hospital (ZMCH) an tlawh. Dr VK Paul chuan, ZMCH-a post graduate zirna ṭan tuma hmalak mek chu theihtawpa bawhzuipui a tum thu a sawi.

ZMCH Council Room-a Health minister Lalrinpuii hoa inkawmnaah Dr VK Paul chuan, ZMCH-a post graduate zirna ṭan tura hmalak mek chu theihtawpa bawhzuisak a tum thu a sawi bakah, ZMCH Critical Care block sak ṭan mek tihchangtlun chungchang te, hospital leh academic tichangtlung tura hmalak meknaahte theihtawpa hmalakpui a tum thu a sawi a ni.

Dr VK Paul chuan, Civil Hospital, Aizawla Administrative Block leh Laboratory Block bakah, Serchhip District Hospital sakna tur sum DoNER Ministry-ah dilpui a inhuam thu a sawi a; Mizoram infant mortality rate (IMR) 3 ni mek chu India rama ṭha ber (hniam ber) a nih thu sawiin, Mizoram Health department hmalaknate ṭha a tih thu a tarlang.

Ngawr (TB), sikserh (malaria), sentût (measles), rubella leh phár (leprosy)-te Mizoram aṭanga ûm bo turin Health department hotute a fuih a; primary healthcare a ngaih pawimawh thu leh tichangtlung tura Health department hmalaknaah a ṭul anga puih a inhuam thu a sawi bawk.

Inkawmhonaah hian ZMCH director Dr John Zohmingthanga'n ZMCH chanchin, hmalakna leh mamawhte a tarlang a; NHM mission director Dr Eric Zomawia'n Mizoram health sector chungchanga thil pawimawh hrang hrangte a tarlang thung.