Aizawl Day lawmna khâr

Aizawl Day vawi 136-na, February 25, 2025-a lawm ṭan chu nimin khan Lammualah lawm chhunzawm a ni a, tlaiah a khârna hun hman a ni.

Aizawl Day 2025 lawmna khàr inkhawm hi executive corporator Lalringliana'n a kaihruai a; deputy mayor R Thanglura'n thu sawiin, AMC deputy commissioner K Vanlalruata, Aizawl Day Organising Committee ni bawkin Aizawl Day lawm dan a sawi.

Ni thum chhung Lammuala Aizawl Day lawmnaah Mizo thil siam hrang hrang pho lan a ni a; concert, cosplay, naupang infiamna hunte buatsaih a ni. AMC chuan, Aizawl Day lawmna a hlawhtlin theihna tura thâ thawhtute leh chhimtu mipui chungah an lawm thu an tarlang.

Aizawl hi February 25, 1890 aṭangin mei mit tawh loin luah ṭan a ni a; Aizawl Day vawi 136-na lawmna atan Mayor’s Cup Inter Ward Basketball Tournament buatsaih niin, local council team 37 an tel. College Quiz Competition buatsaihah college 12 aṭangin team 21 an tel a; Short Documentary Film insiamsiak buatsaih a ni. Aizawla hotel leh restaurant fai thlan niin, lawmman pek an ni a; faina leh thianghlimna lama hma la ṭha mimal 78 hnenah chawimawina hlan a ni bawk.