ZPM sorkarah mipuiin beiseina an nei hniam tawh - MPCC Sr.VP

MPCC senior vice president Lalnunmawia Chuaungo chuan nimin khan North Vanlaiphai Lersia Hall-a Hrangturzo East Block chhunga Congress VC member tharte chawimawinaah thu sawiin, ZPM kum khat sorkarah mipuiin beiseina an nei hniam tawh hle a, Congress party-ah inrintâwkna nasa tak a thleng niin a sawi.

Lalnunmawia Chuaungo chuan, VC leh LC inthlan zawh takah MLA leh MP inthlan aiin Congress pary vote hmuh (share) nasa takin a pung niin a sawi a, "ZPM kum khat sorkarah mipuite'n beiseina an nei hniam nghal hle a, Congress party-ah inrintâwkna nasa takin a thleng. Aizawl leh Lunglei khawpuiah mipuiin Congress-ah rinna an nghat," a ti.

Congress vote share a pun chhan sawiin Lalnunmawia chuan, "Hruaitu ṭha, tling leh Pathian ṭih mi, mahni intarlan tum ngai lo president Pu Lal Thanzara kan neih vang a ni," a ti a; Lal Thanzara chu MFA hruaitu a nih lai pawha hruaitu ṭha, a hun laia Mizoram football vanglai thlenpuitu a nih avangin MFA president a nih loh hnuah Mizoram football-in hniam lam a pan niin a sawi.

MPCC Sr Vice President chuan, ZPM sorkarin sorkar sum a enkawl dan a fuh lo nia sawiin, "An nawm an mâka an hman mai mai tur a ni lo. An in tiam ang ngeia fel leh ṭha taka hman hi an tih tur a ni. Hmunphiah chingtute dinhmun an tikhawlo zo a, sawhthing tihral dan an sawi ṭhenkhat phei chuan tlâkranna a thlen dawn bakah, a hralh leh a lei kawngah an chiang lo em em," a ti.

Lalnunmawia Chuau­ngo chuan, sorkarna an chelh leh huna kalpui mai theih turin NLUP chu ṭang puihna nena kai kawpin an siam dawn thu a sawi nawn a, "Mizoram hmun hrang hrangah zirchianna neih mek a ni," a ti a; ZPM sorkar chu an term kal mek pawh an hmang tluan thei dawna a lan loh avangin Congress party an inbuatsaih mek niin a sawi.