Khawpui cheina tur ruahmanna sawifiah
District Beautification Competition atana district pakuate'n ruahmanna an siam ṭheuhte chu nimin khan Secretariat conference hall-ah UDPA minister K Sapdanga leh a endiktu MZU-a Department of Planning & Architecture aṭanga mithiamte hmaah a lem nen an sawifiah.
UDPA Minister chuan, district khawpui fai leh che imawi kawnga hmalakna pakhat atan Beautification Competition buatsaih a nih thu a sawi a; district hotute leh UDPA department-a thawkte chu intihsiakna atan leh hmalakna hrang hrang atan theihtawp chhuah turin a chah.
Inelna hi municipal corporation/council la nei lo district pakua - Siaha, Champhai, Kolasib, Serchhip, Lawngtlai, Mamit, Hnahthial, Saitual leh Khawzawl tana buatsaih a ni.
District tin hian an district ṭheuh chei mawi dan tur ruahmanna - detailed project report an siam a, DPR-te chu sorkarah thehlutin, nimin endiktute hmaah an sawifiah a ni. March 3-13, 2025 chhungin a hmunah endik a ni ang a, March 21, 2025-ah lawmman sem a ni ang.
He inelnaah hian a ti ṭha district pathumte'n lawmman Rs 50,00,000 ṭheuh an dawng dawn a, inelnaa tel district dang zawngin Rs 2,00,000 an dawng dawn a ni.