YRC Convention Centre hawn a ni

KṬP-in an din Youth Recreation Centre (YRC), Falkland Veng, Aizawla Convention Centre chu nimin tlai khan Synod mode-rator Rev. RC Lalnghakliana'n a hawng.

YRC Convention Centre hawnna inkhawm hi Central KṬP leader Rev. H Lalawmpuia'n a kaihruai a, Synod executive secretary (i/c KṬP) Rev. Dr Rosiamliana Tochhawng-in thu a sawi a ni.

YRC din tur hian kum 2015 aṭang khan hmalak niin, thil chi hrang hrang awm tura duan a ni a, kum 2015 aṭang hian KṬP member tinin kum tin pawisa an thawh khawm ṭan a, October 13, 2015-ah a lungphùm phùm a ni. Ṭawngṭaina in (hall) leh ṭawngṭaina intê eng emaw zat siamte chu November 30, 2019 khan hawn a lo ni tawh.

Nimina an hawn tâk hi Convention Centre a ni a, sa turin Central KṬP leh Lushai Engineers chuan October 24, 2019 khan inremna thuthlung an ziak. Convention Centre sakna atan hian sak nan Rs 8,44,28,280 sên a ni a; mi 900 lenna hall, mi 100 (mipa 60 leh hmeichhia) riah theihna dormitory, dining hall, restaurant, Synod Choir Cabin leh thil dangte a awm.