Bungraw lak luh endiknaah khauh dawn

State Tax commissioner HK Lalhawng-liana chuan dan loa Mizorama bungraw lak luh tihtawp a nih theih dan tur chungchangah nimin khan a pisaah tlawmngai pawl leh sumdawng pawl hruaitute a kâwm a; chhiah lakna dan zâwm loa bungraw lak luh tihtawp a nih theih nan Mizoram Goods and Services Tax Act, 2017 and Rules khauh taka kalpui a nih dawn thu a sawi.

HK Lalhawngliana chuan, dan hmang-in khauh zawkin bungraw lutte enfiah a nih tawh dawn thu sawiin, "MGST-in a phût angin sumdawngte leh Mizorama bungraw phur luttute’n bungrua an lak luhin e-waybill, GST tax invoice leh bill of supply (exempt-ah)-te an nei ngei tur a ni a, heng document-te leh an bungraw phurhte hi a dik ngei em tih enfiah nan Vairengte-ah data collection centre din a ni," a ti.

Dan zâwm loa bungrua la lut an tam hlea hriat a nih thu sawiin Lalhawngliana chuan, "Hei vang hian kan state-in chhiah a dawn tur ang a dawn loh phah ṭhin a, thawktu indaih lohna avangin Vairengte data collection centre-ah duh ang thâlin enfiahna hi kalpui theih a ni ṭhin lo. Hetihrual hian theihtawpin hma kan la a ni," a ti a, April, 2025 aṭang chuan uluk leh khauh taka kalpui an tum tawh thu a sawi.

Commissioner of State Tax chuan, dan loa bungraw lak luh venpui turin tlawmngai pawl, sumdawng pawl leh mipuite ṭanrualpui turin a sawm a ni.

Inkawmhonaah Central YMA, Mizoram Merchant Association (MIMA), Mizoram Truck Owners Association (MTOA) leh Mizoram Chemist and Druggist Association (MCDA) aiawhte an tel.