KHAWTHLIR

HBC-in thisen pe

Hrangbana College NSS unit chuan February 25, 27 leh 28, ni thum chhung khan thisen pek an huaihawt a, Civil Hospital, Aizawl tan thisen unit 223 an pe. February 25-ah mipa 44 leh hmeichhia 25-in unit 69, February 27-ah mipa 66 leh hmeichhia 21-in unit 87 leh, nimin khan mipa 45 leh hmeichhia 22-te'n unit 67 an pe a; thisen petute hi an vaiin mipa 155 leh hmeichhia 68 an ni.

Silai leh a mu man

Assam Rifles sipaite leh Mizoram Police-te chuan February 27, Ningani khan Lawngtlaiah mi pahnih hnen aṭangin silai leh a mu an man a, Siahaah mi pakhat hnen aṭangin 22mm Air Carbine leh a mu an man bawk.

Zu leh beer man

Lunglei Police-te chuan February 27, Ningani khan Zobawk daiah truck MZ-03 0459 aṭangin sapzu ûm puitling 84, ûm chanve 24, quarter 72 leh beer bûr 72 an man. Truck khalhtu Suresh Murmu (33), Jharkhand leh a handyman Sunil Rai (19), Silchar, Assam te an man nghal bawk.

KṬP rorel inkhawm

Nizan khan Chawnpui Kohhran biak-inah KṬP Rorel Inkhawm vawi 11-na ṭan a ni a, March 2, Pathianni zanah a ṭiak ang. Nizan khan palai lawmna leh report pekin hun hman a ni a, vawiinah nilengin rorel a ni ang a, zanin aṭanga Pathianni zan thleng Pathian biak inkhawm a awm ang. February 2024 dinhmun angin KṬP-ah hian branch 904 a awm a, member 1,71,404 awmin, mipa 1,04,736 leh hmeichhia 66,668 an ni.

Link road hawng

Mualkawi-Tuirini Rehabilitation Link Road thar chu nimin khan bialtu MLA PC Vanlalruata, Agriculture minister-in a hawng. Minister chuan, link road thar chu nûl leh huan siam chhungkaw 100 velin an chhawr tur thu a sawi. Link road hawn tak hi FOCUS project hnuaiah cheng nuai 333 sênga siam a ni a, km. 4.6-a thui niin, inchi 5-a chhaha GSB leh inchi 4-a chhaha concrete-in siam a ni.