Damdawi-in fai inelna lawmman sem

National Health Mission (NHM) bultumin nimin khan Vaivakawn Cultural Centre cum Auditorium-ah kum 2023-24 leh 2024-25 chhunga sorkar damdawi-in fai inelna, Kayakalp-a ti ṭhate hnenah lawmman hlan a ni a, Health minister Lalrinpuii'n a hmanpui.

Health Minister chuan, Kayakalp-in a tum ber chu faina a nih thu sawiin, "Mizorama damdawi-in hrang hrang, sub-centre aṭanga district hospital thlengin ka tlawh tam tawh viau a, hengah hian Kayakalp hi a hlawhtling hle a ni," a ti a; Kayakalp lawmman la dawng lo damdawi-in an la awm a nih chuan nasa lehzuala ṭan la turin a chah.

National Quality Assurance Standards (NQAS) leh Kayakalp endiknate ṭha taka an hlen chhuah chuan service pawh a ṭhat sawt a beisei thu sawiin Lalrinpuii chuan, "Heng zawng zawng kan tih chhan ber - mipui leh damlote kan enkawlna kawngah hmasawnna a awm ve si loh chuan awmzia a nei lo. Kayakalp leh NQAS laimu berte zinga mi chu hawihhâwmna a ni," a ti.

Kayakalp hnuaiah hian sorkar damdawi-inte chu endikna tur duan sa (checklist) chhâwng thum hmangin endik ṭhin a ni.