SAKSHAM 2024-25 Campaign khâr

Assembly speaker Lalbiakzama chuan nimin khan Lalbiakliana Filling Station-ah tuialhthei renchem dan leh awmze neia hman dan inzirtirna, Stimulating Advanced Knowledge for Sustainable Health Management (SAKSHAM) 2024-25 Campaign khârna hun a hmanpui.

Lalbiakzama chuan, tuialhtheiah sum tam tak hman ral ṭhin a nih bakah, hriselna leh boruak thianghlim nghawng thei thil ṭha lo a chhuah nasat thu a sawi a, "Petrol hman tlem tial tial a, a ṭulah chauh hman inzirtirte bakah, nizung chakna leh kawlphethaa tihnun theih khawl leh lirtheite hman kan uar thara kan inzirtir a ngai tawh hle a ni," a ti.

Assembly Speaker chuan, tuialhthei hman dan awmze nei leh renchem chu Ministry of Petroleum and Natural Gas chuan sum leh pai nghawng thil a nih bakah mipui hrisel zawkna tura hmalakna a nih avangin a ngaih pawimawh thu a sawi a; SAKSHAM project hnuaiah mipui zirtirna ngawrh taka kalpui a nih thu a sawi bawk.