MP-in Vairengte College lungphùm phúm

Lok Sabha MP Richard Vanlalhmangaiha chuan nimin khan Vairengte College building sakna tur lungphùm a phúm. MP chuan, college din a nihin a in ringawt a tâwk lo a, rei tak daih tur (sustainability) ngaihtuah tel a ṭul thu a sawi.

Richard Vanlalhmangaiha chuan, "College din a nih hian a building-ah ringawt a tâwk zo lo a, sustainability ngaihtuah tel a ngai. Building nei ngawt ila, thawktu tur kan hmuh si loh chuan building chu a ram mai dawn. Chief Minister leh Higher & Technical Education Minister-te nen ngaihtuah tlangin Vairengte College ṭha tak kan neih thuai ka beisei," a ti.

Lok Sabha BP chuan, college din tura Vairengte khaw mipui inlungrualna chu fakawm a tih thu a sawi a; Vairengte khaw mipui chu ṭhenawm state nena buaina a awm chánga rál hmatáwnga awm ṭhin, huaisen leh inthurual tak an nih thu a sawi bawk.

Vairengte College sakna tur lungphùm phùmna inkhawm hi Vairengte SDO (Civil) H Vanlalbiakzaua'n a kaihruai a, Vairengte College Governing Body assistant secretary Z Lalremliana'n technical report a pe a ni.