Chief Secretary-in Mamit a tlawh

Chief secretary Khilli Ram Meena chuan March 1, Inrinni khan Mamit a tlawh a, DC conference hall-ah bawrhsap K Laltlawmlova leh sorkar department hrang hrang hotute nen an inkâwm.

Khilli Ram Meena chuan, Mamit district-a hmasawnna hna kal mekte ṭha taka a kal theih nan theihtawp chhuah turin sorkar official-te a chah a, "Mamit district hi dinhmun ṭha zawka ding turin kan ṭanrual a ngai. Mipui hnen thleng phak ngeiin mahni hna ṭheuhah taima takin thawk ang che u," a ti.

Mamit DC K Laltlawmlova tarlan danin, Mamit district hi sq.km. 3,025-a zau a ni a, chenna in 20,902 awmin, mi 1,01,290 an chêng. Ziak leh chhiar thiam zat (literacy rate) 84.93% a ni.

Aspirational District hnuaia hmalakna tehfung hrang hrangah Mamit district hi an chet ṭhat avangin NITI Aayog aṭangin lawmman cheng vbc. 19 an dawng tawh a; tehna (ranking) hnuhnung ber (overall performance)-ah pangana an ni.

Mamit SP Pukhraj Kamal pawhin thu sawiin, police sub-division pathum - Mamit, Kawrthah leh West Phaileng hnuaia police station panga leh out post pakhat dinhmun bakah, venhimna hna leh dan bawhchhiate man chhuak tura an thawh dan hrang hrangte a tarlang.

Chief Secratary hian 132KV Bairabi - West Phaileng via Mamit leh Mamit College a tlawh bawk.