KṬP-in ruihhlo do chhunzawm an rêl; 2024 chhungin KṬP member 615 an thi

KṬP Rorel Inkhawm vawi 11-na, February 28, 2025 aṭanga Chawnpui Kohhran biak-ina neih chu nizan khan a ṭiak. Rorelah hian ruihhlo do chungchangah hmalak chhunzawm zel rêl a ni a; kum 2024 chhung khan KṬP member 615 an thi tih tarlan a ni.

KṬP Rorel Inkhawmah hian Inrinni khan nilengin rorel a ni a, Central KṬP leader Rev. H Lalawmpuia'n a kaihruai. Bial KṬP hrang hrang aṭanga ruihhlo do chhunzawm tura rawtna chu pawm a ni a, a ṭul anga ruahmanna siam turin CKṬP kutah an dah.

Street Ministry neih rawtna an pawm a, kum 2026-27 kumpuan atan rawtna 23 aṭangin ‘Chhungril takna’ tih an thlang. YRC budget chu kum hmasa aia zângkhai zawka siam leh Hospital Charity Fund leh chawmdawlna pual thawhlawm thawh an rel a; kum 2027 Rorel Inkhawm neihna atan Kulikawn Kohhran an thlang bawk.

KṬP report-a a lan danin, kum 2024 chhung khan KṬP member 615 an thi a, chu'ng zinga 541 (87.96%) chu mipa an ni a, mi 74 (12.04%) chu hmeichhia an ni.

Kum 2024 chhunga KṬP member thi tamna ber bial Republic Veng bialah mi 13 (mipa 10 leh hmeichhia 3) an thi a; mi 12 thi awmna Champhai Vengthlang bial leh Ramhlun North bialte'n an dawt. Hetih lai hian, KṬP member thi awm lohna pastor bial 62 a awm.

Nikuma KṬP member mipa thi zat 541 hi mipa zawng zawng 1,07,535 aṭangin 0.50% a ni a, hmeichhia thi 74 chu hmeichhia zawng zawng 70,013 aṭangin 0.11% a ni.

Kum 2024 chhunga KṬP member thi hi kum 2023 chhunga thi mi 552 (mipa 484 leh hmeichhia 68) aiin 63-in an tam zawk. Kum 2022 chhung khan KṬP member 643 an thi a, mipa 567 leh hmeichhia 76 an ni.

KṬP-ah hian member 1,77,548 an awm mek a, mipa 1,07,535 leh hmeichhia 70,013 an ni. Kum 2024 chhung khan KṬP member nupui/pasal nei 3,389 an awm a, chu'ng zinga 1,577 (46.53%) chu biak-ina innei niin, mi 1,812 (53.47%) chu hmun danga innei an ni thung.

KṬP rorel inkhawm hi general conference neih loh kuma neih ṭhin a ni a, tun ṭuma Rorel Inkhawm vawi 11-na hi nizan khan a ṭiak a ni.