Minister-in Aizawla hnathawhte a tlawh

Urban Development & Poverty Alleviation (UDPA) minister K Sapdanga chuan March 1, Inrinni khan Aizawl Smart City hnuaia project pariat thawh mek a tlawh a; contractor-te kâwmin, hna kal mek leh hmabak awmte a zawtfiah.

UDPA Minister hian High Field-a Multipurpose Ground, Dawrpuia Aizawl City Centre, Zemabawk Playground, Zuangtui Indoor Stadium, Durtlang Playground, Chaltlang Multipurpose Sports Hall, Chaltlang Tourist Lodge leh Hlimen Playground-te a tlawh a ni.

Minister hi Planning secretary Lalmalsawma Pachuau, Aizawl Smart City chief executive officer CC Lalchhuangkima, UDPA joint secretary Zarzokimi bakah, UDPA Secretariat leh Aizawl Smart City hotute'n an ṭawiawm a ni.

UDPA MINISTER-IN PROJECT A TLAWHTE

High Field Multipurpose Ground:
• Cheng vbc 16.06 ruahman a ni a, contractor chu Lushai Engineers a ni. February 2023-ah hna ṭan niin, 71% zawh a ni tawh a, December 2025-ah zawh an inbeisei.
• Football khelmual (73mx31m), open gym, naupang infiamna hmun, cycling track, elevated jogging track, cricket practice pitch, motor parking-te a awm dawn.

New Market City Centre:
• Cheng vbc 40.35 ruahman a ni a, contractor chu Lushai Engineers a ni. October 2022-ah hna ṭan a ni a, 59% zawh tawh niin, December 2026-ah zawh an inbeisei.
• Dawr (stall) 1,102 a awm dawn a; cold storage, CCTV, ATM, food court, office leh conference room bakah, motor parking zau tak dah a ni dawn.

Zemabawk khelmual:
• Cheng vbc 24.94 ruahman niin, contractor chu NECS a ni. November 2022-ah hna ṭan niin, 79% zawh a ni tawh a, June 2025-ah siam zawh an inbeisei.
• Khelmual metre 100 X 60-a zau a ni a, phullêm phah tur niin, mi 700 vel len theihna gallery siam a ni ang.

Zuangtui Indoor Stadium:
• Cheng vbc 14.60 senna tur niin, contractor chu F Lalliansanga, Aizawl Venglai a ni a; June 2022-ah hna a ṭan a, 99% zawh tawh niin, March 2025 hian hawn hman tum a ni.
• Badminton court paruk, gym, mipa leh hmeichhe tan dormitory, player-te inthlakna room, first aid room, coach room, yoga room, football khelmual (metre 73x31), open gym, naupang infiamna hmun, cycling track, elevated jogging track, cricket practice pitch, cafeteria, pantry, pump room leh thil dangte a awm dawn.

Durtlang khelmual:
• Cheng vbc 17.88 senna tur a ni a, contractor chu Biakliana & Sons, Mission Veng a ni. November 2022-ah hna ṭan niin, 89% an zo tawh a, October 2025-ah siam zawh an inbeisei.
• Khelmual metre 110 x 68-a zau a ni a, phullem phah tur niin, gallery pahnih mi 1,257 lenna siam a ni. Conference hall, media lounge, VIP lounge leh thil dang eng emaw zat siam a ni dawn bawk.

Chaltlang Sports Multipurpose Hall:
• Cheng vbc 13.52 ruahman a ni a, contractor H Sanga & Sons, Chanmari a ni. November 2022-ah hna ṭan niin, 72% zawh a ni tawh a, November 2025-ah zawh hman an inbeisei. Basketball-cum-volley court, gallery mi 216 len theihna, boxing ring, TT board pahnih, mipa leh hmeichhe dormitory, conference hall, etc. a awm dawn.

Chaltlang Tourist Lodge tihchangtlun:
• Cheng vbc 18.12 senna tur a ni a, contractor chu Allied Concern, Dawrpui a ni. February 2023-ah hna ṭan a ni a, 78% thawh zawh tawh niin, October 2025-ah zawh theih an inbeisei.
• Mi 339 len theihna auditorium, restaurant, staff quarters pariat leh lirthei eng emaw zat dahna siam a ni dawn.

Hlimen khelmual:
• Cheng vbc 6.59 ruahman a ni a, contractor chu Lalhming Infrastructure & Construction a ni. April 2022-ah hna thawh ṭan niin, 92% zawh a ni tawh a, October 2025-ah zawh hman an inbeisei.
• Khelmual metre 100 x 50-a zau siam a ni a, mi 696 len theihna gallery, office, VIP lounge, lobby, sports bungraw zawrhna dawr leh thil dang eng emaw zat siam a ni.