KHAWTHLIR

Thisen pe

March 1, Inrinni khan KṬP, Phunchawng Branch-in Synod Hospital tan thisen unit 17 an pe a, petute mipa 16 leh hmeichhia pahnih an ni a; Amotlah Pastor Bial KTP pawhin Siaha District Hospital tan unit 23 an pe a, petute mipa 17 leh hmeichhia paruk an ni. ṬKP, Maranatha Unit, Lawngtlai ten Lawngtlai District Hospital tan thisen unit 22 an pe a, petute mipa 19 leh hmeichhia pathum an ni a; Salvation Army Youth, Serchhip Corp ten Disterict Hospital tan thisen unit 5 an pe bawk.

Ruihhlo man

Assam Rifles sipaite chuan February 28, 2025 khan Zokhawtharah methamphetamine kg. 20.209 an man a; February 27 khan Zokhawthar kawngah heroin (no. 4) gram 492 an man bawk. Ruihhlo mante hi Zokhawthar Police Station-ah an hlan a ni.

DC mawhphurhna inhlan

Champhai bawrhsap thar Mohammed Aaquib, IAS chuan February 28, 2025 khan bawrhsap kal chhuak tur VL Remliana hnen aṭangin DC mawhphurhna a la. VL Remliana hian State Election Commission secretary hna a thawk zui ang. Mohammed Aaquib hi IAS (2021 batch) niin, Sant Kisan Nagar district, Uttar Pradesh chhuak a ni a, IIT-Madras aṭangin kum 2017 khan B.Tech (Mechanical Engineering) a zo. Kum 2020 khan IPS-ah a tling a, kum 2021 khan IAS-ah a ziak tling leh a; probation period a hman chhungin Mizoramah - Aizawl, Serchhip, Thenzawl leh Kawnpuiahte hna a lo thawk tawh a ni.

PS-ah puan pe

YMA, Ramthar Veng Branch chuan nimin khan Aizawla police station leh outpost hrang hrangah puan an pe. Thu dawn danin, Ramthar Veng YMA hian Aizawl Police Station, Bawngkawn PS, Kulikawn PS, Vaivakawn PS leh Zonuam Outpost-ah puan 15 ṭheuh an pe a ni.

100% digitization

Kolasib district Lead Bank office buatsaihin February 28, 2025 khan Kolasib Venglai Bazar chu pawisa fai tel loa khawl (digital) hmanga thil lei leh hralh theihna hmun, 100% Digitization atan puan a ni. March chhung hian Mizoram pumah vantlang thil lei leh hralhna hmunpuite chu 100% digitization kalpui tura ruahman mek a ni.

Watershed Yatra

March 1, Inrinni khan Hnahthial district-a Kawlhri khuaah PMKSY 2.0 hnuaia Watershed Yatra Campaign buatsaih a ni a, DRDO project director HD Lalpekmawia'n a kaihruai. Tuihna humhalh, leilung luang ral tur ven leh awmze nei zawka ruahtui khawl pawimawhnate inzirtir a ni a; PMKSY 2.0 project area-a thawk ṭha mi pathum hnenah chawimawina Watershed Margdarshaks hlan a ni.