Rajya Sabha MP-in Chin state a tlawh

Rajya Sabha MP K Vanlalvena chuan February 27-28, 2025 khan Myanmar ram chhung Chin state-a hmun ṭhenkhat a tlawh a; unau karah inhriatthiam lohna eng pawh awm se, inbiakna hmanga sutkian ṭhin tur a ni tih thu a sawi.

K Vanlalvena hian February 27 khan Chinland Council sorkar ṭhuthmun Camp Victoria a tlawh a, Chinland Council sorkar hruaitute leh Chinland sipaite'n an lo hmuak. Chinland chief minister Pathanga, minister-te leh sorkar mi pawimawh dangte nen an inkawm bakah, hmun pawimawhte an fangho a ni. February 28 khan Khawmawi a tlawh a, Hualngoram sorkar (HPO) hruaitute nen an inkâwm.

MP K Vanlalvena chuan, India, Myanmar leh Bangladesh-a Zo fate chu hnam hming hrang leh ṭawng nei ni mah se hnam khat an nih thu a sawi a, "Pathianin chanchin ṭha hril tura a thlan hnam kan nih avangin kan la ding chhuak ngei ngei dawn. Inpumkhatna kan vawng reng tur a ni. Unau karah inhriatthiam lohna eng pawh awm se, silaia inkah hmanga sawi fel loin, inbiakna hmanga sutkian ṭhin tur a ni," a ti.

Lok Sabha MP chuan, Chin leh Mizo chu unau an nih avangin ramri hung pawh Ṭiau-ah ni loin, Chindwin lui kamah ni se a duh thu sawiin, "Myanmar nena kan ramri chu Ṭiau a ni lo a, Chindwin a ni a, thlang lamah pawh Bangladesh phaizawl thlengin a ni," a ti a; ram leh hnam chhan nan mi tam takin nunna an hlan tawh a, tunah ṭhalai tam tak an pên chhuak leh mek chu a ngaihhlut thu a sawi bawk.