Lawngtlaiah Hlukhla Kût hman a ni

February 28 leh March 1, 2025 khan Lawngtlaia CYLA Khelmualah Hlukhla Kût hman a ni a, hnam lâm leh zai chi hrang hrang entir a ni.

Hlukhla Kût hi Lai hnam kût lian ber leh ngaihhlut ber a ni a, kum tin hman ṭhin a ni. Kuminah chuan ni hnih chhung hman a ni a; hnam lâm chi hrang hrang, hnam incheina leh hnam infiamnate entir a nih bakah, zaithiam eng emaw zat an zai bawk.

Hlukhla Kût hi March 1, Inrinni khan adviser to CM Dr Lorrain Lalpekliana Chinzah, Lawngtlai East bialtu MLA-in a hmanpui a, hnam ziaránga harh tharna chan a ṭul thu sawiin, "A bik takin hnam inthuamna leh ṭawng lamah harh thar a ṭul. Chhungkua, khawtlang leh ram siam ṭha turin mahni nihnnaa chian hmasak a ngai a, pi leh pute ro hlu - nun ze mawi, rinawmna leh taimaknate i vawng nung zel ang u," a ti.

Zirthiamna lama ṭan lak a ṭul thu sawiin MLA chuan, "Thiamna sang zawk nei turin theihtawp chhuahin i thawk ang u. Ziak leh chhiara hniam lam pan a hlauhawm a, hnam anga theihtawp chhuah a ṭul a, hnam ziaráng leh kalphungte ziaka dahṭhat a pawimawh," a ti a; khawtlang enkawltute hlut leh zah kawngah hmasawn turin mipui a chah bawk.