SEC-in LADC VC thlan tur a bawhzui

State election commissioner (SEC) Dr H Lalthangliana chuan Chakma Autonomous District Council (CADC) village council inthlanpui neih tur chungchangah February 28, 2025 khan Lawngtlai DC conference hall-ah election official-te leh political party aiawhte a kâwm.

Dr H Lalthangliana chuan, CADC VC inthlanpui awm tura hmalaknate a hmuna endik tur leh party-te hnena ngenna siam tura kal a nih thu a sawi a, "Inthlanna felfai leh thianghlim awm tura election official-te hmalakna fakawm a, kan hmuh chinah mit a tlung hle. Vote chhiar chungchangah official-te fimkhur zual a ṭul," a ti. Political party-te chu vote chhiar ṭhat ngai nia an hria a nih chuan a hun laia complaint siam a, dan ang taka thil kalpui turin a chah.

SEC chuan, zalen leh thianghlim taka inthlan a nih theih nan political party-te thawhpuiah a sáwm a, "Ballot paper hman a nih dawn avangin vote thlak dan, vote thi awm theih dan zawng zawngte in party mi leh sate chiang takin hril u la, theihtawp chhuahin election official-te lo thawhpui ang che u," a ti a; nasa lehzuala ṭan la turin a sáwm bawk.

Inkawmhonaah hian SEC secretary K Laldingliana, Lawngtlai bawrhsap Cheemala Siva Gopal Reddy leh SP Lokeshwaran R te pawhin thu an sawi a; zawhna leh chhanna hun hman a ni.