KHAWTHLIR

State Referral Hospital-ah nimin khan Covid-19 vei mi 11 dah luh an ni a, anni nen hripui vei mi 59 enkawl mek an ni. SRH-ZMC Bulletin tarlan danin, mi 59 zinga mi pathum chu ICU-ah enkawl an ni a, an vaiin ventilator hmantir vek an ni. Isolation ward-a awm mi 56 zingah ngaih­tuahawm an awm lo.

Sorkar hna diltute'n awlsam zawka MPSC office-a kal kher loa dilna (application) an thehluh theihna tura MPSC online portal - mpsconline.mizoram.gov.in chu nimin khan MPSC chairman Lalramthanga Tochhawng-in a hawng. Portal-ah hian hna diltute'n hming, pa hming, address, qualification, contact number leh ṭul dangte chhu lutin, an passport size thlalak leh signature-te upload-in account an siam thei a; phone number chu username-ah hmantir nghal a ni.

Traffic SP chuan thupek chhuahin, nimin aṭang khan Electric Veng LC huam chhung Dika Hardware Store aṭanga Kai lui (Elim) inkar kawngpuiah PHE-in pipe an phûm dawn avangin, kawngpuiah fimkhur tak leh hna thawktute ngaichâng chunga lirthei khalh turin mipui a hriattir. Hnathawh tibuai thei turin kawngpui sirah lirthei leh bungrua dah a khap bawk.

46 Assam Rifle chuan nimin khan Vaitin khuaah free medical camp an buatsaih a, chief medical officer Jacob L Pulamte chuan insawiselna neite hriselna dinhmun a endik. Mi 155 an inentir a, a thlàwnin damdawi an pe nghal a ni.

Assam leh Mizoram ramri buainaa hliam Malsawmkima chungchangah a pa, Lalsanglura, Vairengte chuan thuchhuah siamin, an fapain hliam a tawrhnaah duhsakna leh ṭawngṭaina an dawn nasat thu a tarlang a, "Intihbuaina kara mahni nunna thàpa kan fapa min lak chhuahsaktute chungah kan lawm hle. Damdawi-ina thawk te, sorkar hruaitu, NGO leh damdawi-ina min kantute chungah thinlung takin lawmthu kan sawi a ni," a ti.