Covid-19: Mizoram dinhmun Ni 2 chhungin 88 hmuh belh

October 23-24, ni hnih chhung khan Mizoramah Covid-19 vei mi 88 hmuh chhuah a ni a, Inrinni leh nimin khan hripui laka fihlim tawh mi 13 chhuahtir an ni thung. Mizorama Covid-19 positive hmuh tawh zat chu mi 2,447 an ni a, an zinga mi 2,202 (89.99%) an chhuak tawh.

October 23, Zirtawpni khan Covid-19 vei mi 30 hmuh chhuah a ni a; ZMC laboratory-ah mi 20, TrueNAT-PCR hmangin district pariatah mi panga leh Rapid Antigen Test (RAT) hmangin district pa­kuaah mi panga hmuh a ni.

October 24, Inrinni-ah hripui vei mi 58 hmuh chhuah leh a ni a; ZMC labo­ratory-ah mi 40, TrueNAT-PCR hmangin dis­trict pasarihah mi 12 leh RAT hmangin district pa­kuaah mi paruk hmuh a ni. 

Inrinni khan Covid-19 laka fihlim tawh mi pakua - SRH-ZMC aṭangin pathum, SIRD Kolasib CCC aṭangin pali, Champhai leh Lawngtlai CCC aṭangin pakhat ve ve chhuahtir an ni a; nimin khan mi pali - SRH-ZMC aṭangin mi pahnih, Kolasib DCHC leh Berawtlang CCC aṭangin pakhat ve ve chhuahtir leh an ni.

Mizoramah Covid-19 positive mi 2,447 hmuh chhuah tawh a ni a, mipa 1,949 leh hmeichhia 498 an ni. An zinga mi 2,202 (89.99%) chu chhuahtir an ni tawh a, enkawl mek mi 245 (10.01%) an awm.

October 23 khan ZMC-ah swab sample 404, TrueNAT-PCR hmangin district pariatah sample 163, RAT hmangin district pakuaah sample 536, a vaiin mi 1,103-te swab sample endik a ni. October 24 khan ZMC-ah sample 450, TrueNAT-PCR hmangin district pasarihah sample 143 leh RAT-in district pakuaah sample 528, a vaiin mi 1,121 swab sample endik a ni bawk.

Sorkar thuchhuaha a lan danin, ZMC laboratory-ah October 23 khan Covid-19 vei mi 20 hmuh chhuah an ni a, Aizawla cheng mipa 11 leh hmeichhia pakua an ni. An zingah state páwn aṭanga tun hnaia rawn lut mipa paruk, kum 18-56 inkar, Covid-19 symptom nei lo vek an awm. Mi dang 14 chu Mizoram chhunga kái an ni thung.

Mizoram chhunga káite chu - Bethlehem Vengthlanga mi panga, mipa pathum leh hmeichhia pahnih, kum 20-66 te, Dawrpui venga mipa pakhat leh hmeichhia pahnih puitling vek te, Republic Venga hmeichhia kum 24 mi te, Zuangtuia hmeichhia kum 22 te, Chanmari venga mipa kum 16 mi te, Khatlaa hmeichhia kum 29 mi te, ZMC-a thawk hmeichhia pahnih (Falkawn leh Khatla South)-te an ni.

TrueNAT-PCR hmangin Serchhip District Hospital-ah mi pathum hmuh chhuah a ni a; Chanmari venga mipa pahnih leh hmeichhia pakhat, symptom nei lo an ni. An zingah naupang kum 4 leh 6 mi an tel.

RAT hmangin Chawngte (Kamalanagar-2)-ah hmeichhia kum 58 leh 71 mi, Guwahati aṭanga rawn lut hmuh a ni a, pakhatin symptom a nei. Zemabawk North-ah pawh hmeichhia kum 40, symptom nei hmuh a ni. Lawngtlaiah L-III venga hmeichhe tleirawl kum 16, South Heath School-a pawl 12 zirlai leh Vengpui I-a mipa kum 32, Don Bosco School zirtirtu hmuh chhuah a ni bawk.

October 23 zan khan Bairabi screening point-ah state pawn aṭanga rawn lutte RAT hmanga endik zingah Guwahati aṭanga rawn haw mipa kum 63 mi leh a fanu kum 25 mi hmuh a ni a, Kawnpui khaw mi an ni. An pahnih hian State Referral Hospital-ah dah luh nghal niin, pa zawk chu ICU-ah an enkawl nghal.

Covid-19 vei October 24-a hmuh chhuah mi 58 zinga 40 chu ZMC laboratory-a hmuh an ni a, mipa 26 leh hmeichhia hmeichhia 14 an ni. Mi 32 chu Mizoram chhunga kái an ni a, pariat chu state pawn aṭanga rawn lut an ni thung.

Mi 40 zingah hnam dang pali, state páwn aṭanga rawn lut an tel a, chungte chu - Thingsulthliah Pioneer camp-a inkhung hrang lai mipa kum 41 leh 53 mite leh, Thingsul Tlangnuama GVV Constructions hnuaia thawk kum 28 leh 34 mi, an hmuna inkhung hrang laite an ni.

State pawn aṭanga rawn lût dangte chu - Tanhrila cheng mipa pathum, kum 19 mi vek, tun hnaia Karimganj, Assam aṭanga rawn haw an ni a; quarantine facility-a awm lai niin, symptom an nei lo. State páwn aṭanga rawn haw zingah Vaivakawna hmeichhia kum 20, Shillong aṭanga rawn haw, home quarantine lai a tel bawk.

ZMC-a hmuh chhuah, Aizawl leh khaw dang ṭhenkhata mite chu - 

Sorkar thuchhuah tarlan danin, TrueNAT-PCR hmangin Kolasib-ah mipa pahnih kum 27 leh 38 leh, hmeichhia kum 28 mi hmuh a ni a; mipate hi Thingdawl khuaa awm, tun hnaia Assam aṭanga rawn lut niin, quarantine facility-a awm lai, symptom nei lo an ni. Hmeichhia chu Kawnpui khaw mi, mahni ina inkhung lai a ni a, symptom nei a ni.

Serchhipah pawh TrueNAT-PCR hmangin mipa kum 27 leh hmeichhia kum 47-a upa hmuh a ni a, symptom an nei lo. Mipa hi Thentlang khaw mi, Manipur aṭanga rawn haw niin, hmeichhia chu Serchhip AOC Venga cheng, Bihar aṭanga rawn haw a ni a; Serchhip Tourist Lodge-a inkhung mek ve ve an ni.

Khawzawlah TrueNAT-PCR hmangin mipa kum 30 leh 32 mi hmuh a ni a; Tualte khaw mi, Nagaland aṭanga rawn haw leh Biate khaw mi, Leh (Ladakh) aṭanga rawn haw an ni. Quarantine facility-a awm lai niin, symptom an nei lo.

TrueNAT-PCR hmang vêkin Hnahthialah mipa panga, hnam dang vek hmuh chhuah a ni a, ABCI Infrastructures hnuaia thawk tura rawn lut, ABCI camp-a khung hran lai, symptom nei lo an ni.

RAT hmangin Aizawlah hripui vei mipa leh hmeichhia pahnih ve ve hmuh a ni a, Kolasib-ah mipa puitling pahnih, Mizoram leilung fa ni lo, quarantine facility-a awm lai hmuh a ni bawk.

Aizawla hmuh chhuahte chu - Electric Venga mipa tleirawl kum 14 mi te, Khatlaa hmeichhia kum 30 mi, Lenmawi Girl's Hostel-a awm te, Ram­hlun Sports Complex-a mipa kum 16 leh hmeichhia kum 44-te an ni. Ramhlun Sports Complex-a mite hi Aizawl Civil Hospital OPD-a inentir tura kal, symptom an neih vanga an lo endik a ni.