Municipal corporation-ah AMC leh tum ADA-a thawktute awm dan tur la chiang lo

Aizawl Municipal Council (AMC) chu sorkar laipui duh dan angin municipal corporation-ah leh tum a ni. Hetih lai hian, AMC-a chhûn luh tak Aizawl Development Authority (ADA)-a thawktu tam zawkte awm dan tur tihchian a la ni lo.

Urban Development & Po­ver­ty Alleviation (UD&PA) depart­ment hotute hnen aṭanga Vanglaini thu dawn danin, Aizawl khawpuia mihring awm zat chu 3,00,000 a tling ṭêp tawh. Sorkar laipuiin municipal corporation ni tura mihring awm ngai zat 3,00,000 hi AMC inthlan zawh hnuah chuan an awm tlin rin a ni.
Mihring 3,00,000 an awm tawh chunga AMC chu municipal corporation-a dah a nih loh chuan sorkar laipui lamin an hriatthiam loh a hlauhawm niin an sawi.
UD&PA Minister hoa hemi chungchang ngaihtuahtute chuan AMC chu municipal corporation-a hlankai an pawm tawh. Committee-ah hian opposition MLA-te pawh member-ah telh an ni a; anni hian sorkarah rawtna an thlen ang a, Mizoram sorkarin a pawm chuan AMC chu municipal corporation-a hlankai a ni ang.
Aizawl Municipal Corpo­ration din a nih chuan municipal council aiin urban local bodies (ULB) fund aṭanga sum hmuh a pung thei ang a, sum dang hai luh pawh a pung tura beisei a ni. AMC angin chairman leh vice chairman a awm tawh dawn lo a, mayor leh deputy mayor tia thlak a ni ang. Mayor leh deputy mayor-te hi municipal council hnuaia chairman leh vice chairman-te aiin ULB hnuaiah chuan an dah sâng zawk a ni.
Vanglaini palai zawhna chhangin UD&PA hotute chuan, AMC municipal corporation-a hlankai a nih pawhin an hnathawh tur pek belh a ngaih an rin loh thu an sawi a, "AMC hi an enkawl tur kan pe ṭha hle a, kan pe chak zawk mah mah emaw tih mai tur a ni," an ti.
ADA-a thawkte awm zel dan tur zawhna chhangin UD&PA hotute chuan, "ADA hnuaia thawkte hi Mizoram sorkar lak, ADA lak, deputation-a awm leh muster roll-te an ni. A tam zawk chu deputation-a awm an ni a, anni ho hi chuan an department ngaia kîr leh emaw, AMC hnuaia awm emaw an thlang thei dawn a ni," an ti a; deputation-a awmte duhthlanna chu sorkarin a hnial theih loh tur thu an sawi.
UD&PA hotute sawi danin, ADA-a thawkte awm dan tur tihfelna tur Assembly session hmasa bera ngaihtuah tura thehluh tum a ni a, chumi hma chuan AMC-ah an awm vek rih phawt ang. ADA hnuaiah hian thawktu mi 80 chuang an awm a, muster roll-te chu chhawr zui vek tum an ni.