HM hoin Aizawl traffic chungchang sawiho

Traffic Management Coordination Committee ṭhukhawm chuan Aizawl khawpuia traffic tawt lutuk tih ziaawmna atan lirthei intlanchhawk tir an rel.

Nimina an chairman, Home minister R Lalzir-liana hoa a office-a meeting chuan lirthei intlanchhawk tir chungchangah hian mipui ngaihdan lak a, mipuiin ṭha an tih chuan lirthei number inkawp kim leh inkawpkim lo intlanchhawk tir ni se, an ti.

Meeting-ah hian Mizo­ram Counter Owner Association (MCOA)-te'n maxi-cab stand sawn vanga harsatna sukiang tura ngenna an thehluh pawh sawiho a ni a; tuna kal dang anga kal zel rih ṭha an ti.

Traffic Management Coordination Committee-te hian nimin vek khan Mizoram Assembly House kawt leh Assembly Annexe building chhim lam kawngpui chhuk thlaa Aizawl Municipal Council-in kea kalna tur (footpath) siam an tum chu an enfiah.

Assembly House kawt kawngpuia footpath siam chu ṭha viau mah se, kawngpui a tihzîm dawn avangin siam rih loh an rel a; Aizawl DC pisa zawn kawngpui chhukthlaah footpath siam ni zawk se, two wheeler parking awm mek chu tihtawp ni se, an ti.

Traffic Management Coordination Committee-ah hian parliamentary secretary Lt.Col. ZS Zuala, AMC executive councillor Rosiamngheta, Aizawl SP C Laldina, Traffic SP C Lalthanmawia, PWD CE Lalmuankima leh MJA office bearer-te an tel.