KHAWTHLIR

Thisen pe
Aizawl New Market-a dawr neitu leh nghaktute chuan, nimin khan New Market golden jubilee lawm nan blood donation camp an huaihawt a, Aizawl Civil Hospital tan thisen unit 64 an pe a, a petute mipa 43 leh hmeichhia 21 an ni.

Ruang zawng zel
July 27, 2015 chawhma dar 9 vela Udalphana aṭanga Chawngte lam pana chhuak lawngléng chesuala thi, Dangkali (65) chu nimin thleng khan zawn zel a ni. Thawhlehni tlai dar 4:30 vel khan Chawngte luiah hian Baghanpara bulah ruang nia hriat hmuh a ni a, mahse an chhar hmain a bo leh a ni.

NLUP sem
Horticulture department chuan, nimin khan Mamit district chhunga NLUP hnuaia kuhva, serthlum leh lakhuihthei chìn thlangtute hnenah
ṭanpuina an sem. Nimina ṭanpuina sum sem chhuah zawng zawng chu Rs. 2,96,33,500 a ni.

Greenline Express
Aizawl Municipal Council leh Aizawl City Bus Owners Association-te chuan, Aizawl khawpuia Greenline Express bus tlantir an tum chu August 3, 2015 aṭa-ngin tlantir ṭan an tum. Greenline Express hi A leh B-ah ṭhen a ni dawn a, Ngaizel leh Zemabawk inkarah stand paruk chiah a awm dawn a ni.

Vawktê sem
Rastrya Kendra Vijaya Yojna (RKVY) hnuaiah nimin khan Champhai district chhunga chhungkaw 257 hnenah vawk notê pakhat ṭheuh sem a ni. Vawk notête hi Myanmar aṭanga lak luh a ni a, pakhat Rs. 5,000-a lei a ni.

Home titawp
Social Welfare department chuan Kolasib Khuangpuilama hnuchham enkawlna, David Home licence a tihtawpsak. Social Welfare department thuchhuah tarlan danin, David Home hi kum 2007-a din a ni a, a enawltu home father Lalzoliana chu mipat hmeichhiatna lam hawia an enkawl lai hmeichhe naupang pakhat khawih ṭhina puh a nih vangin licence tihtawpsak a ni.