Khawthlangtuipui-in chenna in 21 a chîm

Tun hnaia ruahsur nasa avangin Khawthlangtuipui a lian zel a, chênna in 21 a chîm bakah, in dang 56 ban a chîm. Nimin lam khan tlemin a kám leh deuha thu dawn a ni.

Tlabung Post editor Vanlal­hriatpuia'n Vanglaini palai a hrilh danin, tuilian hi Tiperaghat khaw mite'n an tuar nasa ber a; in awm zawng zawng 200 vel zinga 20 chu a chhuat chin chung lamah a chîm. In dang 60 vel chu a ban a chîm a, chu'ng chhungkaw 60 vel chu hmun him zawkah thiar chhuah an ni. Nimin lamah a ziaawm deuh a, in pahnih erawh chu a la chim thung. He khuaah hian an bazarte pawh tuiin a chîm deuh vek a, chhungkaw 30 vel leilet a chîm bawk.

Khawthlangtuipui hian Tlabung Bazar Venga Lalnghilhlovi-te in a chîm a, veng danga chênna in paruk dang pawh a ban a chîm thleng a ni. Tuipui kama chawlhna in pali a chim bawk. Tuilian vang hian chhungkaw ṭhenkhat chu an inthiar chhuak a ni.

Silkur, Bindasora, Lamthai leh khaw hrang hrangah pawh tuilian hian chhungkaw eng emaw zat chênna in, leilet leh huan a chîm chhe nasa hlea thu dawn a ni.

Tun tum hi kum 2010 hnu lama Khawthlangtuipui len ber niin an ngai a, kum 1995-a a len vak ṭum erawh a la pha lo.

Tuilian vang hian luia lirtheite thiar káitu marboat a service rih loh avangin Tlabung aṭanga lui ral lehlama awm khaw 10 chuangah lirthei a lut thei rih lo a; ramri hung hna thawh mek pawh chawlhsan rih a ni bawk.