Larsapin oil & gas zawngtute a kâwm

Governor Lt.Gen. Nirbhay Sharma chuan, nimin khan Raj Bhavan conference hall-ah Geology & Mineral Resources department, Oil India Ltd. leh Oil & Natural Gas Corporation (ONGC) hotute a kâwm a, Mizorama an hnathawh mek chungchang a zawtfiah.

Larsap chuan, kum­in chhung ngeiin OIL leh ONGC-te'n Mizoramah hydrocarbon an laih chhuah a beisei thu sawiin, "In hmalaknaah harsatna in neih phawt chuan puih che u ka inhuam reng a ni," an ti a; Corporate Social Res­ponsibility(CSR) ṭanpuina sum pawh awmze nei leh hlâwk tham, mipui náwlpui tana ṭangkai atan hmang turin a chah.

OIL leh ONGC hotute chu hydrocarbon laih chhuah a nih hma ngeia Mizoramin hlâwkna a hmuh tur zatte siam fel vek tura hrilhin Governor chuan, "In hnathawh mek­ah Mizoram University hman ṭangkai dan pawh ngaihtuah tel ni se a duhawm hle," a ti.

ONGC leh OIL hotute hian an hnathawh mek leh thlen chinte chu a lem nen Governor an hrilhfiah a, hmun dang aia kawngpui a têt deuh avanga an veivah hun chhung a rei thu leh, khawl lian phurh luh kawngah harsatna a awm ṭhin thu an sawi.