E&F kudama saphu káwr rutua puh man a ni E&F dept.-a thawkin a puih thu police a hrilh

Environment & Forest department-in saphu káwr an man khawm, Kolasib Range Officer (RO) pisa kudama dah a nih laia rûk chhuah kaihhnawihah July 20, 2015 khan Lalrinchhana s/o Ralliantawna (L), Tuikual chu police-in an man.

Kolasib aṭanga thu dawn dan­in, saphu káwr rûk hi police-te'n ngawrh takin an chhui a; rûk chhuahna motor neitu leh khalhtua puh Lalrin­chhana chu an man ta a ni. Lalrinchhana hi Court-a hruai a nih hnuah Kolasib

District Jail-ah dah a ni.

Kolasib police-te hnena Lal-rinchhana inpuan danin, May 24, 2015 zing khawvar hma, dar 1 velah Kolasib E&F RO pisa kawt aṭangin saphu kâwr a phur chhuak a, saphu kâwrte chu a lema thlakthleng vek a ni.

Lalrinchhana chuan a motor chu saphu kâwr phurh nan hman (hire) a nih thu te, RO pisa kawt­ah E&F-a thawk pakhatin a puih thu te, Aizawl an pan nghal thu leh mipa pakhat leh hmeichhe pakhatin an zui thu te, May 24 zing dar 6 velah Saron Veng, Aizawlah saphu káwrte chu an hlànthlak thute a sawi.

Police-te chuan Lalrinchhana chu Aizawlah hruaiin, Saron Venga an hlànthlakna hmunah an hruai a, mahse Saron Venga a lo dawngzawngtute chu khaw­chhak lamah an chho hmana sawi a ni. Kolasib police-te chuan Champhai leh Zokhawthara police-te an hrilh nghal a, mahse tun thlengin man an la ni lo. Saphu káwr lo latute hi Tahan, Myanmar khaw mi an ni.

Vanglaini palai zawhna chháng­a Kolasib SP C Lalzah­ngoa sawi danin, saphu káwr bo kaihhnawihah hian Aizawla mi pathum - Lalfakzuali d/o K Ngurkhuma (L), Dinthar, PC Lianzuala s/o Engchhunga, Dinthar leh police-in an man tak Lalrin­chhana unaupa, Vanlalthlamuana s/o Ral­lian­­tawna (L), Ramthar Vengte chuan July 24, 2015-ah Addl.

District Session Judge hnenah anti­cipatory bail an dil a; an dilna hi July 31, 2015-ah ngaihtuah a ni ang.

May 24, 2015 zing khawvar hmaa Kolasib E&F RO kudam aṭanga saphu kâwr rûk te hi cheng nuai 17 chuang hû nia thu dawn a ni.