Durtlang khâmah thing phun

Environment & Forest (E&F) department Aizawl Division hmalaknain Durtlang, Leitan, Bawngkawn leh Chaltlang vengte chuan nimin khan local council leh YMA huaihawt­in Durtlang khâm leh a chhehvelah thing phun hnatlang an nei a, E&F minister Lalrinmawia Ralte-in a ṭawiawm.

Lalrinmawia Ralte chuan, veng palite’n an theih ang anga Durtlang khâm leh a chhehvel ram humhalh leh tihhmasawnna tura an hmalakna chuan rah ṭha tak a chhuah zel nia sawiin, “Saza, sakhi, sanghal, záwng, sakuh leh sanghar chi hrang hrang bakah, sava chi hrang hrang awmte hi humahlh tlat an ngai,” a ti a; ramhnuai leh a chhunga cheng ramsate tirîral zawnga che lo turin mipuite a ngen.

Durtlang kham tihhma­sawna khual­zinte tana pawha tlawh chakawm a nih theihna atan sorkar chuan rua­hmanna a siam a, he rua­hmanna hi June 2013 khan chief minister Lal Thanhawla’n Letan community hall-ah a hawng.

Sorkar thuchhuah tarlan dan­in, sorkarin hma a lak hnuah hian inkalpawhna kms. 4.5 a thui siam a ni a, thing chi hrang hrang 2000 chuang phun nih tawh bakah bawlhhlawh paih a nih lohna atan hung a ni.

Durtlang kham hi kangmei lakah a him theihna atan kawng hrang hranga hmalak a ni. Hemi atan hian vengtu rawih an nih bakah, meilamte sial ṭhin a ni.