Aizawlah hripui a darh tawh em ni? Tualchhunga Covid-19 inkaichhawng Ni 2 chhungin veng 25-ah hmuh an ni
October 23-24, ni hnih chhunga Mizorama Covid-19 vei hmuh chhuah mi 88 zingah Mizoram chhunga kái chhâwng (local positive contact) 57 an awm a, chu'ng zingah chuan kàina hriat chian loh mi pariat vel an tel. Ni hnih chhunga Mizorama hripui vei hmuhte hi Aizawla veng 25 leh khaw dang paruka mite an ni.
Sorkar thuchhuah leh Covid-19 veite awmna task force hruaitute hnen aṭanga thu dawn danin, October 23-a hripui vei hmuh chhuah mi 30 zingah Mizoram chhunga kái mi 10 an awm a, Covid-19 symptom nei mi pali an awm.
October 24-a hmuh chhuah mi 58 zingah Mizoram chhunga kái mi 37 zing an awm a, mi 37 zinga mi pasarih chu hri an kàina hriat loh niin, mi 11 chu symptom nei an ni.
Sorkar thuchhuah tarlan danin, Mizoram chhunga hripui kái hmuh chhuah thar mi 57 zingah St. Joseph Higher Secondary School-a hripui vei hmuh chhuah tawh aṭanga kái chhâwng nia hriat mi 15 an tel.
Inrinnia Covid-19 positive hmuh zingah Mizoram Youth Commission (MYC)-a thawk mi paruk an tel a; MYC chairman Dr Vanlalṭanpuia, MLA chu October 22 khan Covid-19 positive a ni tih finfiah a lo ni tawh. Mizoram Rural Bank (MRB)-a thawk mi pahnih an awm bawk.
October 23 zan khan Bairabi screening point-ah Guwahati aṭanga Kawnpuia haw tur hripui vei pahnih, pafa hmuh chhuah a ni a; an pahnihin SRH-ZMC-ah admit nghal niin, pa zawk, kum 63-a upa chu ICU-ah enkawl nghal a ni.