Ram, hnam leh sakhua vawnhim Kan ngaipawimawh hmasa - Tawnluia

MNF sr. vice president Tawnluia chuan MNF chuan Pathianin Mizote ram, hnam leh sakhua a pek vawnhim tlat chu an thil ngaih pawimawh hmasak a nih thu a sawi.

Tawnluia hian nimina Aizawl South-III MNF North leh South Block-te’n Tachhipa an party aṭanga V/C tlingte lawmpuina inkhawm an buatsaih a hmanpuinaah thu sawiin, “MNF hi ram leh hnam chhiat ṭhata mawhphurtu tak tak kan ni. Vai nationalism rilru pute nen khaikhin chi kan ni lo a, anni chuan sum siam nan ringawt party an bel a, keini chuan Pathianin ram, hnam leh sakhua min pek vawnhim tlat hi kan ngaihpawimawh hmasak a ni,” a ti.

AMC leh LADC inthlan lo awm tur chu Congress sorkar chuan a hlauh hlat avangin sawn hlat dan ringawt a ngaihtuah nia sawiin Tawnluia chuan, “Inthlan an hlauh tlat chhan hi eng dang vang ni loin, tlin an huphurh vang leh inthlan buaipuina tur sum an neih loh vang a ni,” a ti a, Congress chhiah leh thil dang hmanga mipui rawkah a puh.