Vairengte-in IR police awmna tur an sa IR-te an awm reng tawh dawn - Bialtu MLA

Vairengte khawtlang chuan October 23, 2020 zan khan an khawi dáia auto-rickshaw stand aṭanga metre 100 vela hláah Mizo IR police-te awmna tur bûk an sa a, IR sipaite'n an luah nghal. Serlui bialtu MLA Lalrinsanga Ralte chuan, bûk sak tharah chuan Mizo IR-te an awm reng tawh tur thu Vanglaini a hrilh.

October 23 khan Vairengte hian khawtlang huapin bûk (in) sak hnatlang huaihawt an tum a, mahse, boruak ṭha lo zawk a thlen loh nan a náwlpuiin an hnatlang lo. Ruah a sûr avangin hna an thawk ṭan mai thei lo a, in sakna turte chu khaw chhungah a theih ang ang an siam lâwk. Tlai dar 5:30 velah in sakna tur hmunah hnatlang an ṭan a, zan dar 8 velah bûk chu an sa zo a ni.

Vairengte khawtlangin bûk an sak lai hian Assam police-te'n ràl aṭangin an en ṭhin a, buaina erawh a awm lo.

Vairengte bialtu MLA Lalrinsanga Ralte chuan Vanglaini palai zawhna chhangin, hnatlanga bûk an sakna hmunah Mizo IR police an awm hlen tawh dawn tih a sawi a, "Kan Chief Minister duh dan angin IR an awm char char tawh dawn a, a ṭul angin an hmunhma cheibàwl chhunzawm a ni ang," a ti.

Ramri-ah sorkar chuan tlàwm a tum lo tih sawiin Lalrinsanga chuan, "Chief Minister remhria leh huaisen tak kaihhruaina hnuaiah kan sorkar hnuah metre 700 velin ramri-ah hma kan sawn tawh a, a lawmawm tak zet. Tuna IR duty post kan sak hi CM duh dan leh remtihna a ni. Tun ṭum hnatlangah hian Vairengte khawtlang nen remruatna fel tak siamin harsatna awm loin kan sa zo thei a, MZP pawh an thawh hlâwk hle," a ti a; Mizoram humhim turin theihtawp an chhuahzel tur thu a sawi. 

Serlui MLA chuan a bial mipui fakin, "Tun hnaia ramri buaina awmah bial mipui an fakawm hle. Kan ram leh hnam tan nunna thàpin theihtawp an chhuah tak meuh a ni. Ruahmanna fel tak hmangin kan ram humhim turin hma an la a, Vairengte mipui hi mi huaisen, ram leh hnam tana tlanchhe ngai lo, eng pawh huam an ni tih Mizoram mipuite'n kan hre reng tawh dawn. Bialtu MLA ka nih angin ka lawm tak zet a ni. Eng pawh thleng se an hmaah ka ding zel ang," a ti.

Zophaiah buaina a awm ṭumin Mizo ṭhalaite'n chhantu an nei lo nia sawiin Lalrinsanga chuan, "Tun ṭumah erawh ram tana beitute sorkarin a thláwp tlat a ni. Chu mai bakah, minister, ruling leh opposition MLA-te'n kan bial min rawn ngaihven reng a, ka lawm tak zet. Pawl leh mimal aṭangin sum leh paia min puih bakah min thlamuana min pui turin mi ṭhahnem tak an lo kal a, lawmthu ka sawi ta a ni," a ti a; ram leh hnam tana thawkho zel turin Mizo mipui a sáwm a ni.