Covid-19 ûmbo thlenga dopuiah CM Zorama'n Mizo mipui a sáwm

Chief minister Zoram­thanga chuan vawiin aṭanga hman ṭan tur 'Covid-19 No Tolerance Fornight' pualin nimin khan thuchah a sawi a; Covid-19 hripui chu ûmbo a nih thlenga ṭan tlàn­puiah Mizo mipui a sáwm.

Chief Minister chuan, hripui donaa hma latu zawng zawng chungah lawmthu sawiin, "Minister, MLA, sorkar hnathawk, tlawmngai pawl leh kohhrante min thlàwpnaah lawmthu thinlung takin ka sawi. Kan thawhhona a ṭhat avangin harsatna lian tham tâwk loin kan la awm thei a ni tih ka hria. Kan tiho ta sa sa, he natna hi kan ram aṭanga kan ûmbo rak thlengin i ṭang tlang zel ang u. Tu mah inrálbànsan thei kan ni lo," a ti.

Covid-19 hripuiin thla sarih vel Mizoram a chènchilh tawh tih sawiin Zoramthanga chuan, "Mizoram chhunga Covid-19 kái hmuh chhuah pawh 2,500 kan hnaih ta hle mai. Kan boruak a ziaawm deuh kan tih hnu lawkah hri kai kan pung leh hluai ṭhin. Hri kai hmuh chhuah zingah natna lang chhuak lo a tam zawk ṭhin a, inenkawl dam leh kawngah pawh buaipui ngai an tam lutuk lo ṭhin," a ti a; tun hnaia hri vei hmuhte erawh chu natna lang chhuak an nih deuh zel thu a sawi.

Covid-19 vei hmuh tharte'n rin aiin an la ná a, anmahni enkawltu damdawi lam thiamte ngaihtuahna pawh a kal thui sâwt hle tih sawiin CM Zorama chuan, "Inenkawl a hautak ṭan ta khawp mai. ZMC-ah ICU khum 17 vel kan nei a, ventilator mamawh an pung zel. Kan ICU khum leh ventilator-in a daih loh damlo serious kan neih a hlauhawm hle. ZMC ICU-ah mi pali an awm mek a, an zinga pakhatin ventilator a hmang. Ward dangah mi 50 awmin, symptom nei mi 21 an awm," a ti. 

Chief Minister chuan, Mizorama Covid-19 dinhmun a ngaihtuahawm chho ta nia a lan avangin sorkar hotu te, tlawmngai pawlte leh kohhran hruaitute inráwn khawmin, Prime Minister-in Jan Andolan a puan thláwp chungin hripui a darh zel loh nan October 26 aṭanga November 9 thleng 'Covid-19 No Tolerance Fortnight' hman rèl a nih thu a sawi a; ram leh mipui himna tur a ni tih hriaa ṭha taka dan zâwm turin mipui a ngen.

Khawvel leh India ram dinhmun enin, hripui chu a kiang mai dawn rih loa a lan thu sawiin Zoramthanga chuan, "A invenna damdawi kan hmuh theih hun tur lah hriat theih a ni si lo. Chuvangin, hripui nena léng za sia kai loh kan tum ber ni se. Chumi tihlawhtling tur chuan nang leh kei hian nasa takin mawh kan phur a ni," a ti.

Chief Minister chuan, Covid-19 chu nunphung leh nungchang a ṭha zawnga thlaksaktu atan hman theih a ni tih hria a, tawrhna kara malsawmna awm tur thlir thiam a pawimawh thu a sawi bawk.