ZPM an pung thúr thúr reng - ZLP Dy. Leader

ZPM party chuan October 24, Inrinni khan Durtlang North-ah an party zawm thar lawm luhna inkhawm an buatsaih a; an hun hmanpuitu ZPM Legislature Party (ZLP) deputy leader Vanlalhlana chuan, ZPM chu eptu an ni chungin an pung thur thur reng niin a sawi.

Vanlalhlana chuan, Pathianin ZPM mal a sàwm nia sawiin, "Opposition ni chungin a ni tèlin an pung chho thûr thûr zel a, hengte hi an thawh nasat bik vang te, an fel bik vangte a ni lo tih i hre reng ang u. ZPM hian Pathiana innghat tlat hruaitu ṭha tak tak an nei a, Pathian malsawmna a ni tih hriain Pathian hriatpui tlakin chêt zia leh ṭawngkam thlengin fimkhur a ngai. ZPM party thil tum lian ber chu - ram rorelnaa Pathian ram tun din a ni," a ti.

ZPM chu rorel lai pawh ni lo, therhlo beisei tur awm lohna party a ni chungin mi ṭha tak takin an bawh zel nia sawiin Vanlalhlana chuan, "Hei hian Mizoram ṭha zawk siam tura Mizo mipuite'n beiseina kan neih nasat tawhzia a tilang chiang hlein ka hria. Mizoram ṭha zawk a pian beiseina nena thlirtu mipui kan ti beidawng ang tih a hlauhawm em em a ni," a ti a; ZPM chu zawm duh tam hle mah se, hri léng vangin hruaitute'n an lawm luh theih loh zawk thu a sawi.

Mi thar lawm luttu ZPM general secretary Phairothanga chuan, ZPM chu mi beidawng ni loin, ram siam duh kal khawm an nih thu a sawi a, "Party naupang tê ni mah ila, kum 2023 inthlan hun kan nghakhlel tawh hle. Pathian khawngaihna leh duhsakna kan dawng a, hmun tinah mi ṭha tak takin min belh zel hi a lawmawm tak zet. ZPM-a lo tel zel tur leh ram siam duh mi mangangte tana beiseina thar siam zel turin party hrang hranga mi leh party-a la tel ngai lote kan sáwm a ni," a ti.